30
Abadantaa, nʼnʼay hunandi koyne
1 Zabur. Irkoy hugoo*30.1 Irkoy hugoo, Ebere šenni ra, almaganaa faa ti kokoy dogoo. talfiyanoo Irkoy ga, dooni. Woo ti Dawda zabur foo.
2 Abadantaa, ay ga ni maaɲoo jer,
zama nʼnʼay tunandi,
mana naŋ agay iberey ma ɲaali nda ay misoo.
3 Abadantaa, ay Koyoo,
ay kaati ka faaba ceeci ni ga, nʼnʼay noo baani.
4 Abadantaa, nʼnʼay kaa alaahara ra,
nʼnʼay hunandi ka mooru borey kaŋ ga zunbu saaraa guusoo ra†30.4 ka mooru borey kaŋ ga zunbu saaraa guusoo ra, hantum fooyaŋ ga nee hala ya si zunbu saaraa guusoo ra..
5 Abadantaa ganakey, wa don a se,
wa nga maa henanantaa saabu.
6 Zama nga futayyanoo manʼti kala waati kayna,
amma nga alhormaa ga cindi boro ga nga hunaroo kul ra.
Alaasaroo ra hẽeni ga tee,
amma subbaahoo ra ɲaali ga tee.
7 Ay lakkalkanaa ra ay ga nee:
«Abada, haya kul sʼay kaa ay dogoo ra!»
8 Abadantaa, nʼna alhormo tee ya ne
ka albarka daŋ tondoo ra kaŋ boŋ ay ga goro.
Amma waatoo kaŋ nʼna ni ndumoo tugu ya ne,
ay zalba.
9 Abadantaa, ay kaati ka ni cee.
Ay na Abadantaa suurandi ka nee:
10 «Macin no nʼga duu a ay kuroo munyanoo ra?
Macin no nʼga duu a nda nʼnʼay zumandi saaraa guusoo ra?
Laboo mma ni saabu wala?
A ga ni laadirtaraa har wala?
11 Haŋajer, Abadantaa, anneema tee ya ne!
Abadantaa, ay faaba!»
12 Nʼnʼay binehẽenoo bere kʼa tee gaani,
nʼna saaku kasaa kaa ay ga ka ɲaali tee ya ne gamahaw,
13 hala ay hundoo ma duu ka don ma ne, ya si dangay.
Abadantaa, ay Koyoo, ay ga ni saabu hala abada.