Masi futu boro laala maaganda se,

masi canse goy futu teekey ga.

2 Zama i ga cahã ka kogu sanda subu

ka kukuši sanda dumari firzi.

3 Ni naanaa daŋ Abadantaa ra, ma goy henna,

ma goro gandaa ra, laadirtaray ma tee ni hunaa.

4 Ma ɲaali nda Abadantaa,

a ga ni noo woo kaŋ ni binoo ga bagʼa.

5 Ni misoo daŋ Abadantaa kaboo ra,

ni naanaa daŋ a ra, a ga ni misoo hanse.

6 A ga ni šerretaraa kaataray sanda gaay kʼa cebe borey se,

ka ni cimoo kaataray sanda zaarikay waynaa.

7 Dangay ka Abadantaa batu,

masi futu boro ga nga goyey booriyanoo se,

wala boro kaŋ ga dabari futuyaŋ tee.

8 Fay nda laalay, futay naŋ,

masi futu, a ga ni daŋ ilaala ra!

9 Zama goy futu teekey ga kaa ka halaci ka hun no,

borey kaŋ ga tammahã Abadantaa ra ga gandaa mayray.

10 Ne nda kayna boro si yee ka dii boro futu!

Nʼga nongoo guna kaŋ ra a cindi, a sii no!

11 Borey kaŋ ga ngi boŋ yeeti ganda ga laboo tubu,

i ga ɲaali nda alaafiyaa timmante.

12 Boro futu ga hawandifutay boro šerrante se,

a ga hiɲe kaama a ga.

13 Abadantaa ga haaru boro futu ra,

zama a ga dii nga zukandoo zaaroo too.

14 Boro futawey ga ngi takubawey hoobu,

i ga ngi birawey cendi,

ka talkaa nda alfukaaroo kaŋandi,

ka borey kaŋ ga dira fondo kaŋ ga šerre ra koosu.

15 Ngi takubawey ga huru ngi boŋ biney ra,

ngi birawey ga kayri.

16 Boro šerrante kabehaya kaccaa

baa boro futu boobo haya boobaa.

17 Zama boro futu kabey ga kayrandi,

amma Abadantaa ga boro šerrantey faaba.

18 Abadantaa ga boro laadirantey aloomuroo bay,

ngi tuboo ga cindi abada.

19 I si haw bone waati,

heray waatey ra i ga kungu.

20 Boro futawey ga kaa ka dere,

Abadantaa iberey ga hima nda kurdoo henna, i ga dere.

I ga dere sanda dullu.

21 Boro futu ga garaw, a sʼa willi,

boro šerrante ga alhormo tee, a ga noo.

22 Zama borey kaŋ Irkoy na albarka daŋ i ra no ma gandaa mayray,

borey kaŋ a nʼi laali ga halaci.

23 Abadantaa no ma albarka daŋ adamize dira takaa ra,

adamize dira takaa ga kan a se.

24 Ba nda a kaŋ, a si cindi a ra,

zama Abadantaa gʼa dii nda kaboo.

25 Za ay zankataray hala ay žen,

ya na bay ka dii Irkoy ma boro šerrante fur,

wala nga hayroo ma nga meehunaa gariibu.

26 Zaaroo kul a ga alhormo tee, a ga borey noo garaw,

nga hayroo ga duu albarka.

27 Mooru haya futu, ma haya henna tee,

nda woo teendi, nʼga cindi ni dogoo ra waati kul.

28 Zama Abadantaa si baa kala cimi,

a si nga ganakey naŋ.

Waati kul a ga lakkal daŋ i se,

amma boro futawey hayroo ka halaci.

29 Boro šerrantey ga gandaa mayray,

i ga cindi a ra hala abada.

30 Boro šerrante miɲoo ga lakkal šenni har,

deenoo ga cimi har.

31 Nga Koyoo ašariyaa goo binoo ra,

a si tatanji nga diraa ra.

32 Boro futu ga boro šerrante monno

ka ceeci kʼa wii.

33 Abadantaa sʼa naŋ kaboo ra,

a si naŋ ciiti ra i mʼa zukandi.

34 Ni tammahãa daŋ Abadantaa ra, cindi nga fondaa ga,

a ga ni jer hala ma gandaa mayray,

nʼga dii boro futu halaciyanoo.

35 Ay dii boro futu nda nga binekogaa kul,

a ga nga boŋ feeri sanda tuuri firzi kaŋ goo nga laboo ra.

36 A dere, a sii no koyne.

Ay nʼa ceeci, amma a si duwandi.

37 Boro laadirante koroši, ma boro kaŋ ga šerre guna,

kokoray henna goo boro se kaŋ goo nda alaafiya.

38 Amma borey kaŋ ga ture ga halaci cere bande,

boro futu kokoraa ga halaci.

39 Boro šerrantey hallasiroo si hun kala Abadantaa do,

nga ti ngi nongu gaabantaa waati šendey ra.

40 Abadantaa gʼi faaba, a gʼi kaa,

a gʼi kaa boro futu kaboo ra, a gʼi hallasi,

zama i nka ngi boŋ talfi a ga.