2 Abadantaa, waati kaŋ ni futu, masʼay zukandi,

waati kaŋ ni binoo tun, masʼay aladabu!

3 Zama ni biraw-izey kaŋ ay ga,

ni kaboo nʼay kar.

4 Ay hamoo ra haya kul mana cindi nga takaa ga ni futuroo maaganda,

alaafiya sii ay birey ra ay zunuboo maaganda.

5 Zama ay laybey kuu ka bisa ay boŋoo,

sanda jeraw tiŋa, i ga hanse ka tiŋ ya ne.

6 Ay dorey funbu ka hinni tee

ay lakkal jaŋantetaraa maaganda.

7 Ay gunguma hala ay hanse ka kooma,

zaaroo kul ay goo binedooray ra.

8 Zama ay dumay-ɲaa-guurey gʼay ton,

ay hamoo ra haya kul mana cindi nga takaa ga.

9 Ay zaŋay, ay hanse ka motti,

ay binoo ga torro, ay ga duray.

10 Ay Koyoo, nʼga hayaa kul bay kaŋ ay ga bagʼa,

ay binehẽeney mo mana tugu ma ne.

11 Ay binoo ga zarga, ay gaaboo ben,

ay moɲey gaayoo mo dere.

12 Ay cerey nda ay hangasiney hibi ay ga ay dorey maaganda,

ay boro maaney mooru ay ga.

13 Borey kaŋ ga ceeci ngi mʼay hundoo kaa ga kumsay hirri ya ne,

borey kaŋ ga baa bone ma duu agay gʼay halaciroo ceeci,

zaaroo kul i ga zanbayan ŋuunuŋuunu.

14 Amma agay, sanda lutu, ay si maa,

sanda benbaw, ay sʼay miɲoo feeri.

15 Ay tee sanda adamize kaŋ si maa,

nda boro kaŋ šenni sii miɲoo ra.

16 Ni no ay ga ni batu, Abadantaa,

ni no ma zaabi, ay Koyoo, ay Irkoy.

17 Zama ay nee: «Yala i masi ɲaali nda ay misoo

wala i ma fooma ay ga nda ay cewey tanši.»

18 Zama agay, ay ga baa ka kaŋ,

ay dooraa goo ay jine waati kul.

19 Zama ay gʼay layboo har,

ay ga dor ay zunubey maaganda.

20 Agay iberey ga saabu i goo nda gaabi,

borey kaŋ ga konna agay yaada ga, ga boobo.

21 Borey kaŋ ga ihenna bana ya ne nda ifutu

gʼay gandu, zama ay ga ihenna ceeci.

22 Masʼay naŋ, Abadantaa!

Ay Koyoo, masi mooru agay!

23 Cahã ka kaa kʼay faaba,

Ay Koyoo kaŋ gʼay hallasi!