40
Irkoy ga gomni tee nga ganakey se
1 Donkey boŋkoynoo ka woo don. Woo ti Dawda zabur foo.
2 Ay na Abadantaa batu nda suuri,
a ɲeli ay ga, a maa ay faaba ceeci kaatiroo.
3 A nʼay žigandi ka hun halaciyan guusoo ra,
ka hun bolongoo batakaraa ra,
a nʼay cewey fur tondoo boŋ,
a nʼay cee diraa noo gaabi.
4 A na dooni taaga daŋ ay miɲoo ra,
maanaa ir Koyoo saabuyan.
Boro boobo ga dii a, de i ga hunbur,
i ga ngi naanaa daŋ Abadantaa ra.
5 Boraa duu gomni kaŋ na nga naanaa daŋ Abadantaa ra,
a si man borey kaŋ ga ngi boŋ beerandi nda taariharkey.
6 Abadantaa, ay Koyoo, nʼna haya boobo kayfanteyaŋ tee
dabarey ra kaŋ nʼnʼi tee ir se.
Ni cine sii no.
Ay ga baa ya hayey wey har, yʼi fee,
i ga hanse ka boobo kabuyan se.
7 Sargari kukurante wala taasu sargari si kan ma ne.
Nʼnʼay haŋawey feeri,
mana sargari kukurante wala zunubu sargari wiri.
8 Woo se ay nee: «Nga ne, agay ne ma kaa,
sanda takaa kaŋ nda a hantumandi ay ga citaabu kunkunantaa ra.»
9 Ay Koyoo, a ga kan ya ne ya ni ibaayoo tee,
ni ašariyaa goo ay gundoo ra.
10 Ay ga ni šerretaraa har margari beeroo ra.
Guna, Abadantaa, nʼga bay ay sʼay miɲoo daabu.
11 Ay si ni šerretaraa daabu ay binoo ra,
ay ga ni cimoo nda ni hallasiroo har,
ay si ni borohennataraa nda ni laadirtaraa tugu
margari beeroo se.
12 Ni, Abadantaa, nʼsi ni hinnaroo wanji ya ne,
ni borohennataraa nda ni laadirtaraa gʼay hawgay waati kul.
13 Zama haya futu booboyaŋ nʼay kuubi kʼay bere,
ay laybey ga kaŋ ay ga,
ay si hin ka ngi diiyanoo muɲe,
i boobo nda ay boŋ hinbirey,
ay binoo hun.
(Zaburey 70.2–6)
14 Abadantaa, suuri mʼay feeri,
Abadantaa, cahã ka kaa kʼay faaba!
15 Yala borey kul cere bande ma haw, boŋey ma sinji,
borey kaŋ ga ceeci ngi mʼay hundoo kaa,
borey kaŋ ga baa ngi mʼay derandi!
Yala borey kaŋ ga bone ceeci ya ne,
ma yee nda banda ka haw!
16 Yala i ma alaabiina nda ngi haawoo,
borey kaŋ gʼay ɲooɲo ka nee: «Wee, wee!»
17 Yala ni ceecikey kul
ma duu ni ra ɲaali nda yafarhã!
Yala borey kaŋ ga baa ni hallasiroo
ma nee waati kul: «Abadantaa ma jer!»
18 Agay, talka ti agay, alfukaaru ti agay,
amma Abadantaa ga hongu agay.
Ni ti ay faabakaa nda ay feerikaa.
Ay Koyoo, masi gay!