2 Boraa duu gomni kaŋ ga lakkal daŋ yalaafantey se!

Bone zaari hane Abadantaa gʼa feeri.

3 Abadantaa gʼa lakkal, a gʼa noo aloomur!

Boraa duu gomni laboo ga,

nʼsʼa tee nga iberey ibaayoo.

4 Abadantaa gʼa faaba nga wirci daaroo boŋ,

nʼgʼa noo baani timmante nga wircoo ra.

5 Agay, ay nee: «Abadantaa, hinna ay ga!

Ay hundoo noo baani, ay na zunubu tee ni ga.»

6 Agay iberey ga šenni laala har ay ga ka nee:

«Waati foo no a ga buu? Waati foo no maaɲoo ga dere?»

7 Nda boro kaa kʼay foo, a mma taari,

haya futuyaŋ ga marga binoo ra,

a mma fatta, a ga šelaŋ taray.

8 Borey kaŋ ga konna agay ga marga kʼay ciinay,

i ga haya futu ceeci ya ne ka nee:

9 «Dori laala ga kaŋ a boŋ!

Nga ne ka kani, a si tun koyne!»

10 Ba ay ceroo, woo kaŋ ay naanay a,

woo kaŋ ga ŋaa ay bande bere ay ga kʼay tafa.

11 Amma ni, Abadantaa, hinna ay ga mʼay tunandi

hala ya bana i ra.

12 Nda agay iberoo mana ɲaali kaatiyaŋ tee kaŋ nga hin agay,

woo ra ay ga bay kaŋ ay ga kan ma ne.

13 Agay, nʼnʼay faaba ay laadirtaraa ra,

waati kul nʼgʼay daŋ ni jeroo ga.

14 Albarka ma bara Abadantaa, Izirayel Koyoo se abada hala abada!

Amin! Amin!