2 Sanda takaa kaŋ nda jeeri ga hari ceeci,

takaa din nda ay hundoo ga ni ceeci, ya Irkoy.

3 Ay ga jaw Irkoy se, Irkoy hunantaa,

waati foo no ay ga koy kay Irkoy jine?

4 Ay mundawey ti ay ŋaahayaa cijin nda zaari,

ka gar zaaroo kul i ga nee ya ne:

«Man ni Koyoo?»

5 Woo kul, hayey ne kaŋ ay ga hongu ey waati kaŋ ay binoo ga hẽe:

ay dira jamaa bande,

ay dira i jine hala Irkoy hugoo do

ɲaali nda albarka daŋyan wurruyaŋ game,

jama beeri goo jingar ra.

6 Ay hundoo, macin se nʼga gaaham buunay?

Macin se nʼga hẽe?

Ni naataa daŋ Irkoy ra!

Ay ga kaa kʼa saabu koyne, nga ti ay Hallasikaa.

7 Ay Koyoo, ay binoo ga hẽe,

woo maaganda se ay ga hongu ni za Žurdeŋ isaa gandaa ra,

za Mitiseyar tondi hondoo boŋ kaŋ goo Hermoŋ tondi hondey ra.

8 Hari guusu beeri ga hari guusu beeri tana cee,

ni harey kaŋ ga zunbu ka hun tondey ra jindoo bande,

ni bondawey nda ni mennawey kul nʼay kar ka bisa.

9 Yala zaaroo ra Abadantaa ma nga borohennataraa cebe,

cijinoo ra nga doonoo mʼay dum.

Ay gʼay hunaroo Koyoo ŋaaray.

10 Ay ga nee ay Koyoo, ay Tondoo se:

«Macin se ni dirɲa agay?

Macin se ay ga dira nda gaaham buunay, iberoo šiitaroo maaganda?»

11 Ay birey gʼay tutubu, ay torrokey gʼay wow

ka nee ya ne zaaroo kul: «Man ni Koyoo?»

12 Ay hundoo, macin se nʼga gaaham buunay,

macin se nʼga hẽe?

Ni naataa daŋ Irkoy ra!

Ay ga kaa kʼa saabu koyne, nga ti ay Hallasikaa, nga ti ay Koyoo.