2 Ya Irkoy, ir haŋawey maa,

ir baabey na teegoyey filla ir se

kaŋ nʼnʼi tee ngi waati,

waatey kaŋ bisa ra.

3 Nʼna ni kaboo ka gandawey gaaray,

ka duu kʼir hayragey gorandi ngi dogey ra,

nʼna gandawey kar hala ir hayragey ma duu doo.

4 Zama manʼti ngi takubawey ka kate i ma gandaa mayray,

manʼti ngi kabey kʼi hallasi,

amma ni kabe gumaa, ni kaboo kʼi kaa, ni ndumoo gaayoo,

zama i kan ma ne.

5 Ya ay Koyoo, ni, ni ti ay Kokoyoo.

Daŋ kaŋ Yakuba borey ma hallasi!

6 Ni albarkaa ra ir gʼir torrokey kar,

ni maaɲoo albarkaa ra ir ga borey motti kaŋ ga kay ir se.

7 Zama manʼti ay biraa ra ay gʼay naanaa daŋ,

manʼti ay takubaa no mʼay hallasi.

8 Amma ni no mʼir hallasi ir torrokey ra,

ka haawi gum borey boŋ kaŋ ga konna ir.

9 Zaaroo kul ir ga fooma nda Irkoy,

ir ga ni maaɲoo saabu hala abada.

10 Amma woo kul, nʼnʼir fur,

nʼnʼir boŋey haw,

nʼsi yee koyne ka hanga ir wongu-ize jamawey.

11 Nʼnʼir zurandi ir torrokey jine,

borey kaŋ ga konna ir gʼir jinawey kul kom.

12 Nʼgʼir daŋ kabe ra sanda feejiyaŋ kaŋ i gʼi ŋaa,

nʼnʼir say dumey ra.

13 Nʼna ni jamaa neere hay faala,

mana duu haya kul ngi hayoo ra.

14 Nʼga naŋ ir taalammey mʼir wow,

borey kaŋ gʼir kuubi kʼir bere gʼir ɲooɲo kʼir haari-haari.

15 Nʼnʼir tee yaasayhaya gandawey se,

nda dumey dii ir, i ga ngi boŋey zinji-zinji.

16 Zaaroo kul ay kaynandoo goo ay jine,

haawoo ga agay ndumoo daabu,

17 kaynandikey nda wowkey šenney maayanoo se,

kaŋ iberey nda borey kaŋ ga baa ngi ma ngi dukuroo kaa ay ra gʼi tee.

18 Woo kul duu ir, amma ir mana dirɲa ni,

ir mana ni amaanaa dunbu.

19 Ir biney mana yee banda,

ir cewey mana hun ni fondaa ra.

20 Woo kul, nʼnʼir motti nzoŋawey gorodogoo ra,

nʼnʼir gum nda buuyan biyoo.

21 Nda a gar ir nka dirɲa ir Koyoo maaɲoo,

nda a gar ir nka kabe gaaru koy tana se,

22 Irkoy nka si bay wala?

A ga bine sirrey bay.

23 Ni maaganda se i gʼir wii zaaroo kul,

i gʼir himandi nda feejiyaŋ kaŋ ga koy koosandi.

24 Ay Koyoo, tun! Macin se nʼga jirbi?

Tun jirboo ra! Masʼir fur abada!

25 Macin se nʼga ni ndumoo bere ir se?

Macin se nʼga dirɲa ir taabiroo nda ir šiitaroo?

26 Zama ir hundey žillandi laboo ra,

ir gundoo denja laboo.

27 Tun kʼir faaba!

Ir kaa kabe ra ni borohennataraa sabbu se!