45
Kokoyoo hiijaa doonoo
1 Donkey boŋkoynoo ka woo don. Dooni kaŋ bande kurbu linji iddukoyni goo. Woo ti Kora izey bayti dooni foo. A manʼti kala baji dooni.
2 Ay binoo ga too nda šenni henna.
Ay nee: «Ay dooni fayyaney hantumey manʼti kala kokoyoo wane!»
Yala ay deenoo ma tee hantumkaw henna kalamoo!
3 Nʼga boori ka bisa adamizey,
alhormo goo ni miɲoo ra,
woo se Irkoy na albarka daŋ ni ra hala abada.
4 Wongaaroo, ni takubaa daŋ ni centoo ga,
a ga ni annuuraa nda ni daržaa cebe.
5 Ni daržaa ra, nʼga huru ni bari torkaa ra
cimoo, nda yee gandayanoo nda šerretaraa sabboo se!
Ni kabe gumaa ga teegoy beeriyaŋ tee!
6 Ni biraw-izey miɲey ga kan,
jamayaŋ ga kaŋ i cire,
i ga huru kokoyoo iberey biney ra.
7 Ya Irkoy, ni kokoy gorodogoo ga cindi abada hala abada,
ni kokoytaraa goboo manʼti kala šerretaray gobu.
8 Šerretaray no ma kan ma ne, nʼga konna ifutu.
Woo se Irkoy, ni Koyoo na ni yon nda ɲaali jii
ka baa ni ka bisa ni hangasiney.
9 Mir, nda alowe nda kas turaari ga ni bankaarawey kul hewey kaanandi,
za ni kokoy hugoo ra kaŋ teendi nda tarkunday hiɲe,
hooray jinay karfey ga ni ɲaalandi.
10 Kokoy ize woyyaŋ goo ni boro daržantey ra,
kokoy woyoo ga taalam nda Ofir gandaa wura ka kay ni kabe gumaa ga.
11 Ay ize woyoo, ma maa, ma guna, ma ni haŋaa gaaru,
dirɲa ni jamaa nda ni baabaa hugoo.
12 Ni booroo ga kan Kokoyoo se,
zama ni koyoo no, sujudu a jine.
13 Nda woo teendi, woy-izoo kaŋ ti Tir koyraa,
wey kaŋ ti jamaa almankoyni ga meekaanay ma ne
ka alhormo ceeci ni ga.
14 Darža beeri goo kokoy ize woyoo ga kokoy hugoo ra,
nga bankaaraa mana taandi nda kala wura.
15 I ga koy nda a kokoyoo do, darbay caaranteyaŋ goo a ga.
I ga woy soogoyaŋ kaŋ ti nga hangasiney hurandi a bande kokoyoo do.
16 I ga koy nda ey nda ɲaali nda yafarhã,
i ga huru kokoy hugoo ra.
17 Ni izʼarey ga huru ni baabey dogoo ra,
nʼgʼi tee boŋkoyniyaŋ gandaa kul ra.
18 Ay ga ni maaɲoo hongandi zamaney kul borey se,
jamawey ga ni saabu waati kul hala abada.