46
Irkoy goo ir bande
Donkey boŋkoynoo ka woo don. Woo ti Kora izey dooni foo. Dooni jinde buuna no.
Irkoy ti nongoo kaŋ ra ir ga ir boŋ talfi, nga ti ir gaaboo,
zarabiyaŋ ra, a gʼir faaba ka boori.
Woo se ir si hunbur ba nda laboo jijiri,
ba nda tondi hondey ga sundu teekoo gamoo ra,
ba nda harey ga boosu i ga zarga
ka tondi hondey jijirandi.
Kay-kayna
 
Isa hari bisadogey ga Irkoy koyraa ɲaalandi,
Koy Jerantaa gorodogey nongu henanantaa no.
Irkoy goo gundoo ra, koyraa si hun dogoo ra,
za moo boo, Irkoy faabaroo ga kaa.
Gandawey ga kaati, kokoytarawey ga zinji-zinji,
Irkoy jindoo fatta, laboo ga menne.
Abadantaa, Aduɲɲakoyoo goo ir bande,
Yakuba Koyoo manʼti kala ir se wakkalkaw.
Kay-kayna
 
Wa kaa ka dii Abadantaa teegoyey
kaŋ ga hasaraw tee laboo ga!
10 A ga wongey kayandi hala aduɲɲa kaydogoo ga,
a ga biraa kayri, a ga yaajoo say,
a ga nuune daŋ bari torkawey ra.
 
11 A nee: «Wa kay, war ma bay kaŋ agay ti Irkoy!
Ay hinoo goo gandawey boŋ, a goo laboo boŋ.»
12 Abadantaa, Aduɲɲakoyoo goo ir bande,
Yakuba Koyoo manʼti kala ir se wakkalkaw.
Kay-kayna