47
Gandawey kul ma kobi Abadantaa se
1 Donkey boŋkoynoo ka woo don. Woo ti Kora izey zabur foo.
2 Gandawey kul borey, wa kobi!
Wa jinde jer ka kaati nda ɲaali Irkoy se!
3 Zama Abadantaa, Koy Jerantaa ga hunburandi,
Kokoy beeri no laboo kul boŋ.
4 A ga jamayaŋ daŋ ir hinoo cire,
a ga gandayaŋ daŋ ir cewey cire.
5 A na ganda suuba ir se kʼa tee ir se tubu,
Yakuba kaŋ a ga bagʼa daržaa.
Kay-kayna
6 Zaame kaati beeriyaŋ ra Irkoy ga žigi,
laatoo hẽenoo bande Abadantaa ga dira.
7 Wa don Irkoy se, wa don!
Wa don ir Kokoyoo se, wa don!
8 Zama Irkoy ti Kokoy laboo kul boŋ,
wa bayti dooni don a se!
9 Irkoy ti Kokoy gandawey boŋ,
Irkoy ga goro nga kokoy gorodoo henanantaa boŋ.
10 Jamawey boŋkoyney ga cere marga
ka tonton Ibirahima Koyoo jamaa ga,
zama Irkoy wane nda kokoyey kaŋ ti laboo korawey.
A ga hanse ka bara haya kul se beene.