2 Abadantaa ga beeri, a ga hanse ka saabandi

ir Koyoo koyraa ra, nga tondi hondoo ga henan.

3 Tondi henna no kaŋ ga tee ɲaali laboo kul se,

Siyoŋ tondi hondoo kaŋ goo hawsa kunehere,

Kokoy beeroo koyraa.

4 Koyraa kokoy hugey ra borey ga bay

kaŋ Irkoy manʼti kala wakkalkaa.

5 Zama kokoyey na cere marga,

i dira cere bande ka koy.

6 Za i dii a, nga no lakkaley tun,

biney dunbu, i kul zuru!

7 No din i jijiri,

ni mma nee woy kaŋ goo taamari kuuboo ra.

8 Ni mma nee dandi hewoo

kaŋ ga harihii beerey kayri kaŋ ga koy Tarsis koyraa ra.

9 Woo kaŋ ir maarʼa, ir dii a

Abadantaa, Aduɲɲakoyoo koyraa ra,

ir Koyoo koyraa ra manʼti kala

Irkoy ga koyraa tabatandi hala abada.

10 Ya Irkoy, ni hugoo gundoo ra,

ir ga hongu ni borohennataraa.

11 Ya Irkoy, sanda ni maaɲoo,

ni saaburoo ga harandi hala laboo kaydogoo ga,

ni kabe gumaa ga too nda šerretaray.

12 Siyoŋ tondi hondoo ma ɲaali,

Žuda gandaa koyrawey ma yafarhã

ni ciitey maaganda se.

13 Wa Siyoŋ kuubi, wʼa kuubi kʼa bere,

wa nga soorohugu kukey kabu

14 ka nga cetewey guna ka boori,

wa nga kokoy hugey laasaabu

ka duu kʼa deede zamanoo kaŋ ga kaa borey se.

15 Koyoo woo ti ir Koyoo waati kul hala abada.

Hala buuyan, nga, a gʼir gongu.