2 Wa haŋajer woo se, jamawey kul,

wa maa, war kul, laboo gorokey kul,

3 ibeerey nda ikaccey,

almankoyney nda talkey kul!

4 Ay miɲoo ga lakkal šenniyaŋ har,

ay binoo ga fahamay hayayaŋ miile.

5 Ay ga haŋa kayandi yaasay se,

ay gʼay šennoo kaŋ ga gum feeri kuntiji jinde ga.

6 Macin se ay ga hunbur bone zaari,

waati kaŋ almunafikey goy futawey gʼay kuubi kʼay bere?

7 Ngi kabehayey ra i ga ngi naanaa daŋ

ka fooma nda ngi alman beeroo.

8 Woo kul, boro si hin ka nga boraa day kʼa kaa kabe ra,

wala ka haya bana Irkoy se hala nga masi buu.

9 Ngi hundoo hayoo ga hanse ka boobo banayan se,

a si hin ka teendi abada.

10 I mma hongu kaŋ ngi ga huna hala abada,

ngi si dii saaraa guusoo wala?

11 Zama boro ga dii kaŋ lakkalkoyney ga buu,

lakkal jaŋantaa nda saamaa mo ga dere

ka ngi kabehayey naŋ boro tanayaŋ se.

12 I ga hongu kaŋ ngi hugey ga cindi hala abada,

kaŋ ngi gorodogey ga cindi zaman nda zaman,

ngi kaŋ na ngi maaɲey daŋ labuyaŋ ga.

13 Amma adamize nda nga beeraa si gay,

a ga hima nda adabba kaŋ ga halaci.

14 Woo ti borey kaŋ ga ngi naanaa daŋ ngi boŋ ra fondaa,

woo ti borey kaŋ ngi boŋ šenney ga kan i se takaa.

15 I ga hima nda adabba buunayaŋ kaŋ ga koy alaahara,

buuyan ga tee i se kurkaw,

ne nda kayna boro šerrantey gʼi taama ka bisa,

ngi booroo ga dere, alaahara ti ngi gorodogoo.

16 Amma Irkoy gʼay kaa alaahara hinoo ra,

zama a gʼay zaa.

17 Masi hunbur nda boro na alman tee,

waati kaŋ nga hugoo daržaa beeri,

18 zama nda a buu, a si koy nda nga bande hayey wey ra ba affoo,

nga daržaa si hanga a.

19 A ga hin ka maakaani nga hunayanoo ra.

Borey ga ni beerandi, zama hayey ga boori.

20 Amma woo kul, nʼga koy nongoo kaŋ ra ni hayragey koy

kaŋyaŋ si yee ka dii gaayoo.

21 Boro nda nga beeraa, a sii nda lakkal,

a ga hima nda adabba kaŋ ga halaci.