50
Irkoy ga nga jamaa ciiti
1 Woo ti Asaf*50.1 Taarikey 1na 6.18–32; 25.1, 4; Zaburey 73—83. zabur foo.
Abadantaa kaŋ ti koyey Koyoo šelaŋ ka laboo cee,
za waynaa fattaroo ga hala nga kaŋyanoo ga.
2 Siyoŋ tondi hondoo kaŋ booroo cine sii boŋ,
Irkoy ga bangay nga daržaa ra.
3 Ir Koyoo ga kaa, a si dangay,
nuune ciray kaŋ ga wiiya bara a jine,
hew beeri kʼa kuubi kʼa bere.
4 A ga beenaa nda laboo cee
i ma tee seede ka nga jamaa ciiti.
5 A nee: «Wʼay ganakey marga ya ne
kaŋyaŋ na sargari kaa ka amaana tee ay bande.»
6 Beenaa ga nga šerretaraa har,
zama Irkoy zaati ti ciitikaw.
Kay-kayna
7 Wa haŋajer, ay jamaa, ay ga šelaŋ,
Izirayel, ay ga seedetaray tee ni ga.
Agay ti Irkoy, ni Koyoo.
8 Manʼti ni sargarey maaganda se ay ga citi ni ga,
ni sargari kukurantey goo ay jine waati kul.
9 Ay si yaaru zaa ni hugoo ra,
wala ka jindaaru zaa ni kaloo ra.
10 Zama hawsaa adabbawey kul
nda tondi hondu zenberyaŋ adabbawey ti agay wane.
11 Ay ga tondi hondey cirawey kul bay,
haya kul kaŋ ga ɲuuti faarey ra ti agay wane.
12 Nda a gar ya mma heray, ay sʼa har ma ne,
zama aduɲɲa ti agay wane, nga nda haya kul kaŋ goo a ra.
13 Ya mma yaaru ham ŋaa wala?
Ya mma jindaaru kuri haŋ wala?
14 Ma albarka daŋyan tee sargari Irkoy se,
ma ni meefurey kaa kaŋ nʼnʼi zaa Koy Jerantaa se!
15 Mʼay cee zarabi zaari hane,
ay ga ni feeri, mʼay beerandi.
16 Amma Irkoy nee boro laala se:
«Macin se nʼgʼay yaamarey har,
de mo agay amaanaa goo ni miɲoo ra?
17 Ka gar nʼga konna ay hoyrawey,
nʼgʼay šenney fur ni dumaa ga!
18 Nda ni dii zay, nʼga tee a bande affoo,
nʼga tee zinateerey bande affoo.
19 Nʼga ni miɲoo feeri ifutu se,
ni deenoo ga dargayan soolu.
20 Nʼga goro ka ni armaa ciinay,
nʼga ni ɲaa izoo maaɲoo hasara.
21 Woo ti hayaa kaŋ nʼnʼa tee, amma ay dangay,
ni nka hongu kaŋ ni cinaa ti agay,
amma ay ga citi ni ga,
ka ni teegoyey kaataray ni moɲey cire.»
22 Ay gʼa wiri war ga, war ma lakkal daŋ woo se,
war kaŋ ga dirɲa Irkoy,
hala ya si koy dunbu-dunbandi,
feerikaw sii no!
23 Boro kaŋ ga albarka daŋyan tee ya ne sargari, boraa nʼay beerandi.
Boro kaŋ ga lakkal daŋ nga dira takaa se,
ay ga Irkoy hallasiroo cebe a se.