51
Zunubu yaafa ceeciyan
1 Donkey boŋkoynoo ka woo don. Woo ti Dawda zabur foo. 2 Dawda ka doonoo woo don waatoo kaŋ annabi Nataŋ koy a do kaŋ Dawda marga nda Batšeba*51.2 Samiyel 2to 11—12..
3 Ya Irkoy, alhormo tee ya ne ka sawa nda ni borohennataraa,
ay tooɲeyaney tuusu ka sawa nda ni tamalla beeroo!
4 Hanse kʼay ɲumay kʼay layboo kaa,
ay henanandi ay zunuboo ra!
5 Zama ay yadda ay tooɲeyaney ga,
de mo waati kul ay zunuboo goo ay jine.
6 Ni ga, ni hinne ga, ay na zunubu tee,
ay na goyfutu tee ni jine,
hayaa kaŋ nʼnʼa har, ni goo nda cimi,
ni ciitoo ga henan.
7 Za ay hayandi, agay nda zunubu no,
za ay ɲaa gundoo ra, zunubante ti agay.
8 Amma nʼsi baa kala cimi ma bara ay ra,
ay bayrandi lakkal sirri ra!
9 Ay zunuboo kaa nda izopu bundu, ay ga henan,
ay ɲumay, ay ga kaaray nda waa.
10 Ay mandi binekaanay nda ɲaali,
woo ra birey kaŋ nʼnʼi kayri ga yafarhã.
11 Masʼay zunubey guna,
ay tooɲewey kul tuusu.
12 Ya Irkoy, bine henanante taka ay ra,
ay hundoo taagandi kʼa tabatandi ay ra.
13 Masʼay moorandi ni,
masi ni Hundi Henanantaa taa ay kone.
14 Ay noo ɲaaloo kaŋ ga hun ni hallasiroo ra,
ay faaba nda hundi kaŋ ga ben ni cire!
15 Ay ga ni fondawey cawandi borey kaŋ ture se,
de zunubantey ga willi kate ni ga.
16 Ya Irkoy, ay Hallasikaa Irkoy,
ay feeri kʼay kaa kuroo alhakoo cire,
de ay deenoo ga kaati ka ni šerretaraa har.
17 Ay Koyoo, ay meetuwey feeri,
de ay miɲoo ga ni saaburoo har.
18 Zama manʼti sargari no ma kan ma ne,
nda manʼti nga, ay gʼa kaa ma ne,
nʼsi yadda sargari kukurante ga.
19 Sargarey kaŋ ga kan Irkoy se manʼti kala bine kaŋ taabi,
hundi kaŋ taabi, a motti,
ya Irkoy, woo ti haya kaŋ nʼsi konna.
20 Ni alhormaa ra ma gomni tee Siyoŋ koyraa se,
Žerizalem cetewey cin!
21 Woo ga, šerretaray sargarey ga kan ma ne,
nda sargari kukuranteyaŋ, nda sargariyaŋ kaŋ tonandi hala i ma ben.
Woo ga, i ga yaaruyaŋ kaa sargari ni sargari tonadogoo boŋ.