55
Boro kaŋ i nʼa zanba Irkoy ŋaarayroo
1 Donkey boŋkoynoo ka woo don. Dooni kaŋ bande hooray jinay linjikoyni goo. Woo ti Dawda bayti dooni foo.
2 Ya Irkoy, haŋadaŋ ay ŋaarayroo se,
masi duma bere ay suurandiyanoo se!
3 Lakkal daŋ ya ne, ay zaabi!
Ay ga koy ay ga kaa, ay ga duray,
4 agay iberoo šenney
nda boro laala kankamroo kaŋ i gʼi tee ya ne sabbu se,
zama ifutu de no i gʼa doori ay boŋ,
ngi futuroo ra i ga konna agay.
5 Ay binoo ga jijiri ay gundoo ra,
buuyan hunburaa ga zunbu ay ga.
6 Hunburay nda jijiriyan nʼay dii,
binedunbay nʼay dii nongoo kul here.
7 Ay nee: «Nda a gar ba ya mma bara nda fata sanda tuuzun!
Ay ga deeši ka duu gorodoo nongu tana ra.
8 Ay ga zuru ka mooru,
ay ga koy goro saajoo ra.
Kay-kayna
9 Ay ga cahã ka dere,
ay ga cahã nda hew beeri, ka bisa kusaw.»
10 Ay Koyoo, ngi šenney ɲaami kʼi zamna!
Zama ay ga dii koyraa ra laalay nda yenjeyaŋ.
11 Cijin nda zaari i mma cetewey kuubi,
ifutu nda laalay goo koyraa gundoo ra,
12 hasaraw de bara gundoo ra,
kankamay nda zanbayan si mooru nga farrey.
13 Nda a gar agay iberi kʼay wow,
nda nga no, ay gʼa suuri.
Nda a gar boro kaŋ ga konna agay ka tun ya ne,
nda nga no, ay ga tugu a se.
14 Amma ni no, ay cine aru,
ay baakaa, ay cere kaanaa!
15 Agay nda ni cindi ka kan,
ir ga koy jamaa bande Irkoy hugoo ra!
16 Yala buuyan ma kaŋ i ga,
yala i ma zunbu alaahara i ga huna!
Zama ifutu bara ngi gorodogey ra, a goo biney ra.
17 Agay, ay ga Irkoy cee,
Abadantaa gʼay hallasi.
18 Cijin, nda subbaahi nda zaarikay ay ga zarabi,
a ga haŋajer ay šennoo se.
19 A nʼay hundoo feeri kʼay noo alaafiya,
a nʼay kaa borey ra kaŋ gʼay wongu,
waatoo kaŋ i ga tee jama ka kaa ay ga.
20 Irkoy ga maa, a gʼi zaabi*55.20 zaabi, Ebere šenni ra, almaganaa faa ti zarabi.,
nga kaŋ ga goro kokoytaraa ra za zaman.
Kay-kayna
Zama i si barmay,
i si hunbur Irkoy.
21 I ga too borey do kaŋ ga goro i bande alaafiya ra,
i ga ngi amaanaa dunbu.
22 Deenoo ga ban nda barkura,
amma wongu bara binoo ra,
nga šenney ga fiši ka bisa jii,
amma takubayaŋ no kaŋ hoobandi.
23 Ni jeraa fur Abadantaa ga,
nga, a ga ni almuraadey hanse,
abada a si naŋ boro šerrante ma kaŋ.
24 Ni, Irkoy, nʼgʼi kaŋandi guusu kukoo ra.
Kuri munkey nda zanbantey
si duu ngi aloomuroo jeroo,
agay, ay gʼay naanaa daŋ ni ra.