57
Irkoy ganakey si wakkal kala Irkoy ga
1 Donkey boŋkoynoo ka woo don. Takaa kaŋ nda a ga doonoo woo don se i ga nee «Masʼa halaci.» Woo ti Dawda bayti foo. A mana doonoo woo don kala waatoo kaŋ ra a ga zuru Sawul jine ka koy tugu tondi horboo ra*57.1 Samiyel 1na 22.1–2; 24.1–9; Zaburey 142.1..
2 Alhormo tee ya ne, ya Irkoy, alhormo tee ya ne!
Ni ga ay ga talfi,
ni fatawey biyoo cire ay ga duu nongoo kaŋ ra ay ga tugu,
hala albalaawoo woo ma bisa.
3 Ay ga Irkoy Jerantaa cee,
Irkoy kaŋ ga haya kul tee ya ne kʼa timmandi.
4 A ga hallasiyan sanba ya ne ka hun beenaa ra,
a ma citi boraa ga kaŋ gʼay gaaray.
Kay-kayna
A ma silbay sanba ya ne kaŋ ga nga borohennataraa nda nga cimoo cebe!
5 Ay hundoo goo ganjihaylawey game,
ay goo ma kani adamize ŋaakawyaŋ game.
Ngi hiɲey manʼti kala yaaji nda biraw-izeyaŋ,
ngi deeney manʼti kala takuba kaana.
6 Ya Irkoy, ni boŋ jer beenaa se beene!
De ni daržaa ma bara laboo kul boŋ beene!
7 I na kumsay hirri ay cewey cire,
ay kayna,
i na guusu fanši ya ne,
i kaŋ a ra.
Kay-kayna
(Zaburey 108.2–6)
8 Ay binoo kanandi, ya Irkoy, ay binoo kanandi,
ay ga don ka ni saabu nda zaburyaŋ.
9 Tun, ay hundoo!
Tun, kurboo! Tun, kuntijoo!
Ay ga alfazaroo tunandi.
10 Ay Koyoo, ay ga albarka daŋ ma ne jamawey ra,
ay ga don ma ne gandawey ra.
11 Zama ni borohennataraa ga too hala beenaa ra,
de ni laadirtaraa ga too hala duulawey do.
12 Ya Irkoy, ni boŋ jer beenaa se beene!
De ni daržaa ma bara laboo kul boŋ beene!