59
Ay Koyoo, ay kaa agay iberey kabey ra
1 Donkey boŋkoynoo ka woo don. Takaa kaŋ nda a ga doonoo woo don se i ga nee «Masʼa halaci.» Woo ti Dawda bayti foo. Dawda mana doonoo woo don kala waatoo kaŋ ra Sawul na boroyaŋ sanba i ma nga hugoo koroši, nda i duu a, i mʼa wii*59.1 Samiyel 1na 19.10–13..
2 Ya ay Koyoo, ay kaa agay iberey ra,
ay sutura borey ra kaŋ tun ya ne!
3 Ay kaa goy futu teekey ra,
ay hallasi boro kuri munkey ra!
4 Zama i na zanbaguusu fanši ya ne,
boro bine laalayaŋ no ma kaŋ ay ga,
bila nda ay ma tooɲe tee,
bila nda ay ma zunubu tee, Abadantaa!
5 Bila nda ay ma laybu kul tee,
i ga zuru, i ga soolu.
Tun kʼay kubay, ma guna!
6 Ni, Abadantaa, Aduɲɲakoyoo, Izirayel Koyoo,
tun ka kay, hala ma huga nda gandawey kul!
Masi alhormo tee boro laala zanbantey wey affoo kul se!
Kay-kayna
7 I ga willi kate cijinoo ra ka kaati sanda hanšiyaŋ,
i ga koyraa kuubi kʼa bere.
8 Nga ne, miɲey ga too nda kufu,
takuba goo deeney ga,
i ga nee: «May no ma maa?»
9 Amma ni, Abadantaa, nʼga haaru i ra,
nʼga gandawey kul fude.
10 Ni ti ay gaaboo, ni no ay ga ni guna,
zama Irkoy ti ay wakkalkaa.
11 Irkoy kaŋ goo nda arrahama ga kaa ay jine,
Irkoy ga naŋ agay iberey ma tee ya ne gunahaya.
12 Masʼi wii, ay jamaa masi koy dirɲaw,
i ma yaara-yaara nda ni gaaboo, mʼi kaŋandi,
ay Koyoo, ir koraa!
13 Miɲey si haya kul har kala zunubu šenniyaŋ.
Naŋ i ma kaŋ ngi boŋ bolsaa ra!
Ngi šenney manʼti kala dangayan nda taari.
14 Ni futuroo ra, i halaci, i halaci, i masi yee ka bara!
Woo ra borey ga bay kaŋ Irkoy ga laama Yakuba boŋ
hala laboo kaydogoo ga!
Kay-kayna
15 I ga willi kate cijinoo ra ka kaati sanda hanšiyaŋ,
i ga koyraa kuubi kʼa bere.
16 I ga yaara nongoo kul ra ka haya ceeci kaŋ ngi gʼa ŋaa,
nda i mana duu, i ga kanihaway.
17 Agay, ay ga don ni gaaboo maaganda se,
subbaahoo ra ay ga ni borohennataraa har,
zama ni ti ay wakkalkaa,
bone zaari hane ni ti nongoo kaŋ ra ay ga tugu.
18 Ya ay Gaaboo, ay ga don ma ne,
zama Irkoy ti ay wakkalkaa,
ay Koyoo kaŋ goo nda arrahama.