60
Irkoy ga haŋajer nga jamaa se kaŋ iberoo hin ey
1 Donkey boŋkoynoo ka woo don. Seedetaray. Woo ti Dawda bayti foo kaŋ a nʼa don ka borey cawandi. 2 A mana doonoo woo don kala waatoo kaŋ ra a koy Siiri borey kaŋ goo Mezopotami nda Siiri borey kaŋ goo Soba wongu, nda mo Žowab willi ka hun Ciiroo gooroo ra kaŋ ra a na Edom boro zenber woy cindi hinka (12.000) kar*60.2 Samiyel 2to 8.1–14; Taarikey 1na 18.3–13..
3 Ya Irkoy, nʼnʼir fur, nʼnʼir say.
Ba nda ni futu, ir yee katandi ir dogey ra!
4 Nʼna laboo jijirandi, nʼnʼa kottu.
Kottey wey hanse, zama a ga kaŋ!
5 Nʼna ni jamaa cebe waati šendayaŋ,
Nʼnʼir haŋandi alaneb hari mooro kaŋ ga boro žininandi.
6 Nʼna borey kaŋ ga hunbur ni noo ni liiliwaloo
hala i ma hallasi ngi iberey biraw-izey ra.
Kay-kayna
(Zaburey 108.7–14)
7 Ir hallasi nda ni kabe gumaa
hala ni baakey ma hun kabe ra, ir zaabi!
8 Irkoy goo nga nongu henanantaa ra, a šelaŋ ka nee:
«Ay ga zaame. Ay ga Šekem koyraa zamna,
ay ga Sukot gooroo neeši.
9 Agay wane Galad gandaa, agay wane Manase gandaa,
Efrayim gandaa ti ay guuru fuulaa,
Žuda gandaa ti ay boŋkoynitaray goboo.
10 Mowab gandaa ti canbu beeroo kaŋ ra ay ga ɲumay,
Edom gandaa ga ay gʼay taami calaa warra.
Filisti gandaa ga ay ga wongu wurru tee†60.10 Filisti gandaa ga ay ga wongu wurru tee, Ebere šenni ra, almaganaa faa ti Filisti borey, wa wongu wurru tee ay ga!.»
11 May no ma koy nda agay koyra gaabantaa ra?
May no mʼay ka koy hala Edom?
12 Ya Irkoy, manʼti ni no kʼir fur wala?
Ya Irkoy, manʼti ni no ka si yee ka koy ir bande wongu ra wala?
13 Ir faaba kʼir kaa ir torrokey kabey ra!
Zama adamize faabaa sii nda alfayda.
14 Irkoy bande ir ga haya beeriyaŋ tee,
nga no mʼir torrokey motti.