62
Lakkalkanay si duwandi kala Irkoy jere
1 Donkey boŋkoynoo ka woo don. Takaa kaŋ nda a ga doonoo woo don se i ga nee «Yedutun». Woo ti Dawda zabur foo.
2 Irkoy hinne jeroo ga ay hundoo goo lakkalkanay ra,
nga ra ay hallasiroo ga hun.
3 Nga hinne ti ay tondoo nda ay hallasiroo,
nga ti wakkalkaa, ay si kaŋ abada.
4 Hala waati foo no war ga fay nda ka kaŋ adamize ga,
war kul ga ceeci kʼa wii,
sanda cete kaŋ šiiri,
sanda kali kaŋ ga kaŋ?
5 Cimi no, i mma ceeci kʼa kaa nga nongu jerantaa ra.
Taari no ma kan i se.
I ga gaarari henna tee miɲey ra,
biney ra i ga danga.
Kay-kayna
6 Ay hundoo ma bara lakkalkanay ra Irkoy hinne jeroo ga,
zama nga ra ay naataa ga hun.
7 Nga hinne ti ay tondoo nda ay hallasiroo,
nga ti ay wakkalkaa, ay si kaŋ.
8 Ay hallasiroo nda ay daržaa sii kala Irkoy ra,
tondoo kaŋ gʼay noo gaabi, nda nongoo kaŋ ra ay gʼay boŋ talfi ti Irkoy.
9 Jamaa, waati kul war ma war naanaa daŋ Irkoy ra!
Wa haya kaŋ goo war biney ra har a se!
Irkoy ti nongoo kaŋ ra ir ga ir boŋ talfi.
Kay-kayna
10 Adamize manʼti kala hew,
boro manʼti kala yaada.
Ba nda i nʼi daŋ neešihaya ga,
i kul cere ra, i ga don nda hew, i ga koy beene.
11 War masi war naanaa daŋ komayan ra,
war masi war boŋ darga nda zaytaray!
Taka kul kaŋ nda alman boobo,
war biney masi hawa ga.
12 Irkoy šelaŋ cee foo,
a šelaŋ cee hinka, ay maarʼa,
gaabi manʼti kala Irkoy wane.
13 Ir Koyoo, ni wane nda borohennataray mo,
zama ni no ma boro foo kul bana ka sawa nda nga teegoyey.