66
Wa kaa ka dii hayaa kaŋ Irkoy nʼa tee
1 Donkey boŋkoynoo ka woo don. Dooni. Zabur.
Laboo gorokey kul, wa kobi Irkoy se!
2 Wa don nga maa daržantaa se,
wʼa saabu ka darža daŋ a ga!
3 Wa nee Irkoy se: «Ni teegoyey ga boro hunburandi!
Ni iberey ga ngi boŋ yeeti ganda ma ne
ni gaabi beeroo maaganda.
4 Laboo kul ga sujudu ni jine ka don ma ne.
I ga don ni maaɲoo se.»
Kay-kayna
5 Wa kaa ka dii Irkoy teegoyey!
Nga haya beerey kaŋ a nʼi tee ga adamize hunburandi.
6 A na teekoo bere kʼa tee labu kogo,
i na isaa dunbu nda cee.
No din ra ir ɲaali a se.
7 A ga laama hala abada nda nga gaaboo,
moɲey ga gandawey koroši.
Yala turantey boŋey masi jer.
Kay-kayna
8 Jamawey, wa albarka daŋ ir Koyoo se,
wa jinde jer kʼa saabu!
9 Nga no mʼir noo hunayan,
a mana naŋ ir cewey ma tanši.
10 Irkoy, nʼnʼir guna ka dii,
nʼnʼir sii sanda takaa kaŋ nda nzorfu kaaray ga siyandi.
11 Nʼnʼir kaŋandi sankay ra,
nʼna tiŋay daŋ ir centey ga.
12 Nʼna bari kaarukaw daŋ ir jine,
ir bisa nuune ra, ir bisa hari ra,
amma nʼnʼir kaa i ra kʼir kungandi.
13 Ay ga koy ni hugoo ra nda sargari kukuranteyaŋ
nda ka hayey kaŋ ay na ngi allaahidoo zaa ma ne tee,
14 hayey kaŋ ay deenoo nʼi soolu, ay miɲoo nʼi har
ay zaraboo waati.
15 Ay ga sargari kukurante naasayaŋ kaa ma ne,
nda gaaruyaŋ nda dugu.
Ay ga adabba beeri nda jindaaruyaŋ kaa ma ne sargari.
Kay-kayna
16 War kul kaŋ ga hunbur Irkoy,
wa kaa ka maa hayaa kaŋ Irkoy nʼa tee ay hundoo se.
17 Ay miɲoo nʼa cee kʼa ŋaaray,
ay deenoo nʼa jer.
18 Nda a gar ya nka doo tee ifutu se ay binoo ra
ay Koyoo si maa ya ne.
19 Amma Irkoy maa ya ne,
a na haŋajer ay ŋaarayroo se.
20 Albarka ma bara Irkoy se,
nga kaŋ mana wanji ay ŋaarayroo,
nga kaŋ mana nga borohennataraa wanji ya ne!