2 Irkoy, nʼga hima nda saabu dooni

kaŋ ga hun ma ne Siyoŋ koyraa ra

nda ka hayey tee kaŋ allaahidoo zandi ma ne.

3 Ni kaŋ ga haŋajer ŋaarayrey se,

hundikoyni kul ga kaa ni do.

4 Ay laybey ga hanse ka tiŋ ya ne,

ni no kʼir tooɲeyaney yaafa.

5 Boraa duu gomni kaŋ nʼnʼa suuba kʼa manandi ni

hala a ma huna ni batumawey ra!

Ir ga kungu ni hugoo gomnoo ra,

ni hugoo haya henanantey ra.

6 Ir Hallasikaa Irkoy, nʼnʼir zaabi ni šerretaraa ra nda teegoy kayfantey.

Borey kaŋ goo aduɲɲa kaydogoo ga nda teekowey se banda,

i kul ga ngi naataa daŋ ni ra.

7 Irkoy gaaboo ga tondi hondey gorandi,

gaabi ti nga gamahawoo.

8 A ga teekowey jindey yeeti ganda,

a ga bondawey yeeti ganda.

A ga jamawey hoolaa yeeti ganda.

9 Borey kaŋ ga goro aduɲɲa kaydogoo ga

ga hunbur ni teegoy kayfantey,

nʼga kate waynahunay nda waynakaŋay ma kaati nda ɲaali.

10 Nʼga huga nda laboo kʼa noo ncirɲi,

nʼga alman kʼa too.

Irkoy gooroo ga too nda hari,

takaa woo nda nʼga laboo soolu kʼa noo taasu.

11 Nʼga faarey nonguyaŋ haŋandi ka labu gungutey kanandi,

nʼgʼi haŋandi nda harey ka dumarey zayandi.

12 Nʼga jiiroo benandi nda ni haya henney,

ni bisayanoo ga haya hennayaŋ naŋ.

13 A ga kurdooyaŋ naŋ saaji kogaa ra,

hondey ga ngi gamey haw nda ɲaali.

14 Kurdogey ga taalam nda adabba buuna,

goorey ga daabandi nda attam.

Kurdogey nda goorey ga ɲaali kaati tee, i ga don.