68
Irkoy goo nda hinay ifutu ga
1 Donkey boŋkoynoo ka woo don. Woo ti Dawda zabur foo. Dooni.
2 Irkoy ga tun, nga iberey ga say,
borey kaŋ ga konna a ga zuru a jine.
3 Sanda takaa kaŋ nda dullu ga dere, nʼgʼi derandi,
sanda takaa kaŋ nda suma ga menne nuune ra,
boro laaley ga dere Irkoy jine.
4 Amma boro šerrantey ga ɲaali, i ga yafarhã Irkoy jine,
i ga kaati nda ɲaali.
5 Wa don Irkoy se, wa zaburyaŋ tee nga maaɲoo se!
Wa fondaa feeri boraa se kaŋ ga kaaru duulawey*68.5 duulawey, Ebere šenni ra, almaganaa faa ti gangani kogey. ga!
Nga maaɲoo manʼti kala Abadantaa, wa yafarhã a jine.
6 Irkoy ti alyatimey baabaa, woyey kaŋ kurɲey buu faasakaa,
a si goro kala nga gorodoo henanantaa ra.
7 Borey kaŋ goo footaray ra, Irkoy gʼi gorandi hugu ra,
a ga kasa-izey kaataray kʼi noo gomni.
Turantey hinne no ma goro nongu kogey ra.
8 Ya Irkoy, waatoo kaŋ ni fatta ka huru ni jamaa jine,
ka dira saaji biboo ra,
Kay-kayna
9 laboo ga jijiri, beenaa ga ncirɲi loti-loti Irkoy jine,
kaŋ ti Sinay tondi hondoo Koyoo,
Irkoy, Izirayel Koyoo jine.
10 Ya Irkoy, nʼna ncirɲi henna zumandi!
Nʼna gaabi daŋ ni gandaa ra kaŋ fara, kaŋ ti ni tuboo.
11 Ni jamaa si goro kala nga ra.
Ya Irkoy, ni borohennataraa ra nʼnʼa hanse boro se kaŋ ga taabi.
12 Ir Koyoo na šenni foo har,
woyey kaŋ ga alhabar boryo har manʼti kala jamaa beeri.
13 Wongu-ize jamawey kokoyey ga zuru, i ga zuru,
woyoo kaŋ ga goro hugoo ra ga duu nga bagaa alganiimaa ra.
14 War mma kani kaley gamey ra wala?
Gubaguba fatawey daabandi nda nzorfu kaaray,
nga fitawey ga kara buy sanda wura.
15 Waatoo kaŋ Hini-kul-koyoo ga kokoyey say-say,
než ma kaŋ Salmoŋ tondi hondoo ga.†68.13–15 Alkaaley 5.
16 Bašaŋ tondi hondoo ti Irkoy tondi hondu,
Bašaŋ tondi hondoo, tondi hondu no kaŋ goo nda boŋ boobo.
17 Macin se war, tondi hondey kaŋ goo nda boŋ boobo,
war ga canse tondi hondoo ga kaŋ kan Irkoy se
nga mʼa tee nga gorodogoo?
Abadantaa ga goro no din waati kul.
18 Irkoy bari torkawey manʼti kala zenber woyyaŋ hala cee zenberyaŋ,
Ir Koyoo goo gamey ra,
Sinay tondi hondoo goo nongu henanantaa ra.
19 Ni žigi ka koy beene, ni kate baɲɲayaŋ ni bande,
nʼna gomniyaŋ dii adamizey
nda ba turantey ga hala ma ni gorodogoo tee no din, Irkoy Abadantaa.
20 Albarka ma bara ir Koyoo se zaari ka kaa zaari!
A ga huga nda ir, Irkoy ti ir hallasiyanoo.
Kay-kayna
21 Irkoy manʼti kala ir se Koy kaŋ ga hallasi.
Abadantaa, ir Koyoo no ma boro kaa buuyan fondaa ra.
22 Nhuu, Irkoy ga nga iberey boŋey kayri,
woo kaŋ ga koy a ga nga tooɲeroo ra,
a ga nga boŋkurunbu hinbirikoynoo kayri.
23 Ir Koyoo nee: «Ay ga yee ka kate nda ey ka hun Bašaŋ tondi hondoo do,
ay ga yee ka kate nda ey ka hun teekoo guusey ra,
24 hala ma ni cewey miti kuroo ra
hala ni hanšey ma duu ngi bagaa iberey ra.»
25 I ga dii ni jamaa kaayanoo, ya Irkoy,
ay Koyoo, ay kokoyoo jamaa kaayanoo nongu henanantaa ra.
26 Donkey goo jine, jinawey kaŋ ga hooray jinay linjikoyney kar,
ngi game woy soogey ga dunduŋ kar.
27 Wa albarka daŋ Irkoy se margarey ra,
Wa albarka daŋ Abadantaa se za Izirayel linjoo ga!
28 Benžameŋ ne, nga kaŋ ti i kul ikaccaa goo i boŋ,
nga banda ga, Žuda boŋkoyney nda ngi jama beeroo,
nda Zabuloŋ boŋkoyney, nda Neftali boŋkoyney.
29 Ni Koyoo na yaamar noo kaŋ ma duu gaabi.
Ya Irkoy, albarka daŋ hayaa ra kaŋ nʼnʼa noo ir se!
30 Ni hugoo kaŋ goo Žerizalem koyraa boŋ
kaŋ ra kokoyyaŋ ga kate ma ne gomni.
31 Ma kašeta adabbaa ga kaŋ goo kakaarey ra,
ngi nda yaaru kuroo, nda jamaa yagaw,
i ma kaa ka sujudu ka nzorfu kaaray tammayaŋ kaa!‡68.31 Adabbawey ti Misira nda gandawey cindey kaŋ ga Izirayel kuubi kʼa bere.
Jamawey say-say kaŋ ga baa wongu.
32 Boro beeriyaŋ ga hun Misira,
Ecopi borey ga cahã ka ngi kabey jer Irkoy here.
33 Laboo kokoy laamawey, wa don Irkoy se,
wa ir Koyoo saabu nda zaburyaŋ.
Kay-kayna
34 A ga kaaru beenaa ga,
beenaa se beene, maanaa cee jinaa beenaa.
Nga ne, boro ga maa jindoo, jinde gaabantaa.
35 Wa Irkoy gaaboo bay Izirayel ga,
wa nga boŋkoynitaraa nda nga gaaboo bay duulawey ra.
36 Ya Irkoy, ni goo ni nongu henanantaa ra
nʼga hunburandi.
Izirayel Koyoo ka gaabi nda hini noo jamaa se.
Albarka ma bara Irkoy se!