69
Irkoy ga boro hallasi
1 Donkey boŋkoynoo ka woo don. Dooni kaŋ bande kurbu linji iddukoyni goo. Woo ti Dawda zabur foo.
2 Ay hallasi, ay Koyoo,
zama harey goo ya ne hala ay kormollaa ga.
3 Ay ga sondu batakara guusu ra,
haya sii no kaŋ ay gʼa dii,
ay zunbu haroo cire ganda, mennaa gʼay zaa.
4 Wurru se ay fara, ay kormollaa kogu,
ay moɲey fara nda ay Koyoo batuyan.
5 Borey kaŋ ga konna agay bila addalil
boobo nda ay boŋ hinbirey.
Borey ga gaabi kaŋ ga baa ngi mʼay halaci,
yaada ga i tun ka tee ya ne iberi.
Ya mma hima ka haya yeeti i se kaŋ ya nʼa taa i kone!
6 Amma ni, Irkoy, nʼgʼay lakkal jaŋantetaraa bay,
ay laybey si tugu ma ne.
7 Ay Koyoo, Abadantaa, Aduɲɲakoyoo,
yala borey kaŋ ga naata ni ga masi haw ay sabbu se,
yala borey kaŋ ga ni ceeci masi haw ay sabbu se,
Izirayel Koyoo!
8 Zama ni maaganda se ay ga kaynandiyaney muɲe,
ni maaganda se haawi gum agay ndumoo ga.
9 Ay tee yaw agay armey se,
ay tee yaw ay ɲaa-izey se.
10 Ni hugoo bajoo alhuzunoo gʼay ŋaa nda kunehere,
ni wowkey wowyaney ga kaŋ ay boŋ.
11 Ay hẽe, ay meehaw,
woo maaganda se i nʼay kaynandi.
12 Ay na saaku kasa daŋ ay ga,
ay tee i se yaasayhaya.
13 Borey kaŋ ga goro koyraa miɲoo ga, ga šelaŋ ay ga,
harifutu haŋkey gʼay tee dooni.
14 Agay, ay ga ni ŋaaray, Abadantaa!
Yala waatoo woo ma tee waati hennaa, ya Irkoy,
ni borohennataray beeroo ra!
Ay zaabi ni laadirtaraa nda ni hallasiroo sabbu se!
15 Ay kaa batakaraa ra, ya si tibi!
Yala ya hallasi borey ra kaŋ ga konna agay
nda hari guusey ra!
16 Yala mennaa masʼay zaa,
yala guusoo masʼay gon,
de dayoo masi daabu ay ga!
17 Ay zaabi, Abadantaa, zama ni borohennataraa ga boori,
ka sawa nda ni anneemaa, bere ay here,
18 masi ni ndumoo tugu agay, ni tamoo se!
Ay goo taabi ra, cahã ka tuuru ya ne!
19 Man kate kʼay hundoo hallasi!
Ay feeri agay iberey maaganda!
20 Ni, nʼgʼay kaynandiyanoo,
nda ay haawoo, nda ay wowyanoo bay.
Ay torrokey kul goo ni jine.
21 Kaynandoo gʼay binoo hasara, ay wirci,
ay na hinnari tammahã, amma baffoo,
ay tammahã boro kaŋ gʼay binoo daŋ, amma ya na duu a.
22 I na pozina daŋ ay ŋaahayaa ra,
kʼay jawoo kaa, binegar no i nʼay haŋandi.
23 Yala ngi ŋaadogoo ma tee i jine kumsay,
ngi gomnoo ma tee i se sankay!
24 Yala moɲey ma kokooru hala i masi dii koyne,
ma dumawey cindandi gungumayan ra.
25 Ni dukuroo doori i boŋ,
yala ni futay beeroo ma kaŋ i ga!
26 Yala ngi gorodogoo ma say,
yala boro kul masi yee ka goro ngi gorodogoo ra!
27 Zama i ga borey gaarandi kaŋ nʼnʼi kar,
i ga borey kaŋ nʼnʼi maray ciinay.
28 Laybu tonton ngi layboo ga,
i masi too ni šerretaraa do!
29 Yala maaɲey ma tuusandi ka hun hunaroo citaaboo ra,
yala i masi hantumandi šerrantey bande!
30 Agay, ay ga taabi, ay ga zarabi,
ya Irkoy, yala ni hallasiroo mʼay jer kʼay faaba!
31 Ay ga don ka Irkoy maaɲoo saabu,
ay gʼa beerandi ka albarka daŋ a se.
32 Woo ga kan Abadantaa se ka bisa haw, ka bisa yaaru
kaŋ goo nda hilliyaŋ nda ceetaamiyaŋ kaŋ ga faya.
33 Borey kaŋ ga ngi boŋ yeeti ganda ga dii a ka ɲaali,
war kaŋ ga Irkoy ceeci, yala war biney ma huna.
34 Zama Abadantaa ga haŋajer talkey se,
a si nga borey kaŋ goo kasa ra yankar.
35 Yala beenaa nda laboo mʼa saabu,
teekowey nda haya kul kaŋ ga ɲuuti i ra mʼa saabu!
36 Zama Irkoy ga kaa ka Siyoŋ koyraa hallasi,
a ga Žuda koyrawey cin,
i ga goro i ra, i gʼi mayray.
37 Nga tamey hayroo ga duu a sanda tubu.
Borey kaŋ ga baa Abadantaa maaɲoo ga goro a ra.