70
Abadantaa, cahã ka kaa kʼay faaba
Donkey boŋkoynoo ka woo don. Woo ti Dawda zabur foo. Hongandiyan dooni ti woo.
(Zaburey 40.14–18)
Ya Irkoy, ay feeri,
Abadantaa, cahã ka kaa kʼay faaba!
Yala borey ma haw, boŋey ma sinji,
borey kaŋ ga ceeci ngi mʼay hundoo kaa!
Yala borey kaŋ ga bone ceeci ya ne,
ma yee nda banda ka haw!
Yala i ma yee nda banda haawi se,
borey kaŋ ga nee: «Wee, wee!»
Yala ni ceecikey kul
ma duu ni ra ɲaali nda yafarhã.
Yala borey kaŋ ga baa ni hallasiroo
ma nee waati kul: «Irkoy ma jer!»
Agay, talka ti agay, alfukaaru ti agay,
ya Irkoy, cahã kʼay faaba!
Ni ti ay faabakaa nda ay feerikaa.
Abadantaa, masi gay!