1 Abadantaa, ni ga ay gʼay boŋ talfi,

yala ya si haw abada!

2 Ni šerretaraa ra, ay feeri, mʼay hallasi!

Ni haŋaa gaaru ya ne, ay hallasi!

3 Tee ya ne tondoo kaŋ ga ay ga goro,

nongu kaŋ ra ay ga hin ka koy waati kul,

hala ya duu ka hallasi!

Zama ni ti ay Tondoo, ni ti ay nongu gaabantaa.

4 Ay Koyoo, ay hallasi kʼay kaa boro futu kaboo ra,

boraa kaŋ ga futu a ga laala kaboo ra.

5 Zama ni ti ay naataa, ay Koyoo, Abadantaa,

ni ti ay tammahãa za ay zankataraa ga.

6 Za ay ɲaa gundoo ra ni ga ay ga felle,

ni kʼay kaa ay ɲaa gundoo ra,

ni, ni saaburoo si hun ay miɲoo ra waati kul.

7 Ay tee boro boobo se boŋhaway,

amma ni ti nongu gaabantaa kaŋ ra ay gʼay boŋ talfi .

8 Yala ay miɲoo ma too met nda ni saaburoo,

ka ni daržaa har zaaroo kul.

9 Masʼay naŋ ay žeenay waatoo ra,

waati kaŋ ay gaaboo ga ben, masʼay fur.

10 Zama agay iberey ga šelaŋ ay ga,

borey kaŋ ga ceeci ngi mʼay hundoo kaa ga cere guna

11 ka nee: «Irkoy nʼa fur,

wʼa gaarandi kʼa dii, zama boro sii no kaŋ gʼa kaa kabe.»

12 Irkoy, masi mooru ay ga,

ay Koyoo, cahã ka kaa kʼay faaba!

13 Borey kaŋ gʼay gandu,

yala i ma haw, yala i ma dere!

Borey kaŋ ga baa ngi ma ifutu tee ya ne,

yala i ma hanse ka kayna, i ma hanse ka haw!

14 Agay, ay naataa goo ni ga waati kul,

ay si fay nda ka ni saaburoo har.

15 Ay miɲoo si fay nda ka ni šerretaraa har,

ka ni hallasiroo har zaaroo kul,

zama ni goy henney si hin ka kabandi.

16 Ay ga huru ay Koyoo, Abadantaa do ka nga teegoy beerey har.

Ni hinne šerretaraa no ay gʼa har.

17 Irkoy, nʼnʼay cawandi za ay zankataraa ga,

hala hõ, ay ga ni teegoy kayfantey har.

18 Ba ay žeenay nda ay hinbiri kaaray ga,

masʼay naŋ, ay Koyoo,

hala ya ni gaaboo bayrandi zamanoo woo se,

ka ni hinoo har borey se kaŋ ga kaa.

19 Irkoy, ni šerretaraa ga too hala beenaa ra,

zama nʼna haya beeriyaŋ tee.

Ya Irkoy, may no ma too ni?

20 Nʼnʼir cebe torro booboyaŋ,

nʼgʼir hunaroo taagandi,

nʼgʼir žigandi kʼir kaa laboo guusu futaa ra.

21 Nʼga tonton ay beeraa ga,

nʼga bere ay here kʼay binoo yaynandi.

22 Woo se, agay mo ay ga ni saabu nda kurbu

ni laadirtaraa maaganda, ay Koyoo

ka ni saabu nda kuntiji,

Izirayel Koy Henanantaa.

23 Ay miɲoo ga kaati nda ɲaali ka don ma ne,

zama nʼnʼay hundoo feeri.

24 Zaaroo kul ay deenoo mo ga ni šerretaraa har,

zama borey kaŋ ga baa ngi ma ifutu tee ya ne,

haawi nda kaynandi nʼi kar.