Ya Irkoy, kokoyoo cawandi ni ciiti takawey,

ka ni šerretaraa daŋ kokoyoo izʼaroo ra,

2 hala a ma duu ka ni jamaa ciiti nda šerretaray,

ka ni borey kaŋ ga taabi ciiti nda cimoo.

3 Tondi hondey ga kate lakkalkanay jamaa se,

Hondey ga kate a se šerretaray.

4 A ga jamaa borey kaŋ ga taabi noo cimi,

a ga talkey izʼarey hallasi

ka ngi šiitakey motti.

5 Kullihinne handoo nda waynaa ga fatta,

zaman ka kaa zaman borey ga hunbur ni.

6 Kokoyoo ma tee sanda ncirɲi

kaŋ ga kaŋ subu kaŋ dunbandi ga,

sanda mišimiši kaŋ ga laboo tayandi.

7 Nga kokoytaraa waati, boro šerrantaa ga tonton,

alaafiyaa ga boobo hala waati kaŋ handoo si yee ka bara.

8 Nga hinoo goo haya kul boŋ,

kʼa dii teeko foo ga ka koy affoo ga,

Efrat isaa ga ka koy laboo kaydogoo ga.

9 Saajoo gorokey ga kanje sonbu a jine,

nga iberey ga labutaasoo logu.

10 Tarsis koyraa kokoyey nda gungey kokoyey

ga kate a se gomni,

Šeba nda Seba gandawey kokoyey gʼa noo hayayaŋ.

11 Kokoyey kul ga sujudu a se,

gandawey kul ga huru a cire.

12 Zama a ga talkey feeri

kaŋ ga kaati ka faaba ceeci

ka borey kaŋ ga taabi gaa kaŋ sii nda faabakaw.

13 A ga hinne alfukaarey nda talkey se,

a ga talkey hunaroo hallasi.

14 A gʼi feeri kʼi kaa tooɲekey nda ifutawey kabey ra,

ngi kuroo manʼti kala haya beeri a do.

15 Kokoyoo ma duu aloomur,

i mʼa noo Šeba wuragoo ra.

I ma Irkoy ŋaaray a se waati kul,

ka gaara a se zaaroo kul.

16 Taasoo ma boobo gandaa ra

ka too hala tondi hondey boŋey ga.

Izey ma boobo sanda Libaŋ gandaa tuuri,

borey ma boobo koyraa ra sanda laboo suboo.

17 Nga maaɲoo ma cindi hala abada,

kullihinne waynaa ga bara, nga maaɲoo ma bara.

Nga bande borey ma duu albarka,

gandawey kul ma nee kaŋ a duu gomni.

18 Albarka ma bara Irkoy Abadantaa, Izirayel Koyoo se

kaŋ hinne no ma kayfiyaŋ tee.

19 Albarka ma bara nga maa daržantaa se hala abada!

Yala laboo kul ma too met nda nga daržaa!

Amin! Amin!