Cimi no, Irkoy ga boori Izirayel se,

a ga boori borey se kaŋ biney ga henan.

2 Woo kul, haya kayna ay cewey baa ka kati,

ay cewey baa ka tanši.

3 Zama ay canse hundi beerey ga,

waati kaŋ ay dii boro laaley arzakaa.

4 Torro kul si duu ey hala ngi buuroo ga,

gaahamey ga saabu.

5 I sii nda baa zaraboo ra kaŋ ga duu borey,

i si fara sanda adamizey.

6 Woo se hundi beeray tee i se jinde hiiri,

ifutu tee i se darbay kaŋ goo i ga.

7 I naasu hala moɲey mma nere,

miile futawey kaŋ goo biney ra si kabandi.

8 I ga borey fude, i ga šelaŋ nda futay ka borey zarabi,

i ga šelaŋ nda hinšitaray.

9 Miɲey ga too hala beenaa,

deeney ga yaara laboo ga.

10 Woo se nga jamaa ga bere i here

ka ngi šenney haŋ sanda hari.

11 I ga nee: «Taka foo nda Irkoy ga haya bay?

Koy Jerantaa ga hin ka bay wala?»

12 Nga ne, takaa woo ti boro laaley,

waati kul lakkaley ga kani, ngi almanoo ga tonton.

13 Adiši, ya nka ay binoo henanandi yaada,

ay nʼay kabey ɲumay ka cebe kaŋ ay ga henan.

14 Zaaroo kul ya mma karandi,

subbaahi kul, ay si duu kala zukandi.

15 Nda a gar ya nka nee kaŋ ay ga šelaŋ sanda ngi takaa,

nga ne, ay ga ni izey zanba.

16 Ay miile ka faham woo se,

a tee ay moɲey ra farayan

17 hala waatoo kaŋ ay too Irkoy nongu henanantaa ra,

nga ra, ay na ngi kokoroo bay.

18 Cimi no, nʼgʼi daŋ fondo tanšanteyaŋ ga,

nʼgʼi kaŋandi halaciyan ra.

19 Wa guna, dogoo din da i tee yaada,

i benandi, bone nʼi derandi.

20 Ay Koyoo, nda ni tun, nʼga ngi takaa benandi sanda yaada,

a ga hima nda handiri kaŋ boro nʼa tee.

A tun jirboo ra, a dere a se.

21 Waatoo kaŋ ay binoo tun,

de ay ga maate kaŋ haya nʼay hay,

22 ay saama, ay si haya kul bay,

ni jine ya nka himandi adabba.

23 Woo kul, waati kul ay goo ni bande,

nʼnʼay dii nda ay kabe gumaa.

24 Nʼgʼay hoyray kʼay gongu,

woo banda ga, nʼgʼay ka koy daržaa ra.

25 May bara ya ne beenaa ra?

Ni banda ga, ay si booni haya kul laboo ga.

26 Ay hamoo nda ay binoo goo ma ben,

amma Irkoy ti ay Tondoo nda ay bagaa hala abada.

27 Zama nga ne, borey kaŋ mooru ni ga, ga halaci,

boro kul kaŋ ga izefututaray tee*73.27 Manʼti gaaham here no, laadir jaŋay no Irkoy here. ni ga, nʼgʼa tuusu.

28 Agay, ya man Irkoy ga boori ya ne.

Nongoo kaŋ ra ay gʼay boŋ talfi ti ay Koyoo, Abadantaa

hala ya duu ka ni teegoyey kul deede.