Irkoy, macin se nʼnʼir fur hala abada?

Macin se ni futuroo ga dullu ni alman kuroo ga?

2 Hongu ni jamaa kaŋ nʼnʼi sawal kʼi tee alkabiilaa

kaŋ tee ni tuboo za zaman mooro,

hongu Siyoŋ tondi hondoo kaŋ ra nʼna ni gorodogoo tee.

3 Dira ka koy nongey guna kaŋ hasara za gayyan,

iberoo na hayaa kul kayri nongu henanantaa ra.

4 Ni nkuwawey goo ma kaati

nongoo kaŋ ra ni borey ga marga,

i na ngi tammaasaa daŋ kaŋ gʼi cebe.

5 I ga hima nda borey kaŋ ga tuurey kayri

nda ngi daašey hawsa tefayantaa ra.

6 I na ni hugoo taalamey kul kayri

nda daašiyaŋ nda guuru-baabayaŋ.

7 I na nuune daŋ ni nongu henanantaa ra kʼa ton,

i na ni maaɲoo gorodogoo kaŋandi ganda kʼa žiibandi.

8 I ga nee ngi boŋ se: «Ir mʼi kul halaci!»

Gandaa ra, i na nongey kul ton kaŋ ra borey ga Irkoy kubay.

9 Ir si yee ka dii ir tammaasawey,

annabi sii no koyne,

boro kul sii ir ra kaŋ ga hayaa woo kaydogoo bay.

10 Irkoy, hala waati foo no torrokaa ga fay nda ni wowyanoo?

Hala waati foo no ni iberoo ga fay nda ni maaɲoo kaynandiyanoo?

11 Macin se nʼga ni kaboo kaa no, ni kabe gumaa?

Ni kaboo kaa ni gandey ga kʼi halaci!

12 Irkoy ti ay kokoyoo za waati mooro,

nga no ma adamizey hallasi laboo ga.

13 Ni no ka teekoo fay ihinka nda ni hinoo,

ka adabba beerey kaŋ goo teekoo ra boŋey motti.

14 Ni no ka dragoŋoo boŋey kayri,

Nʼnʼa tee ŋaahaya saajoo adabbawey*74.14 adabbawey, Ebere šenni ra, almaganaa faa ti gorokey. se.

15 Ni no ka hari fattadoo nda isa-ize kaataray,

ni no ka isayaŋ kaŋ si kogu kogandi.

16 Ni wane zaaroo, cijinoo mo ti ni wane,

ni no ka handoo nda waynaa gorandi.

17 Ni no ka laboo kaydogey kul daŋ,

ni no ka konni waati nda jiyaw waati tee.

18 Hongu woo: Abadantaa no iberoo gʼa kaynandi,

jama lakkal jaŋante ga ni maaɲoo hasara.

19 Masi ni gubagubaa hundoo noo adabbawey se,

abada masi dirɲa ni borey kaŋ ga taabi misoo.

20 Lakkal daŋ ni amaanaa se,

zama gandaa nongey kaŋ ga kubay

ga too nda ifutu teekey gorodogey.

21 Masi boraa kaŋ i gʼa šiita naŋ a ma willi nda haawi.

Yala talkaa nda alfukaaroo ma ni maaɲoo saabu.

22 Tun Irkoy, ma faasa ni boŋ se,

hongu wowey kaŋ lakkal jaŋantey

gʼi har ma ne zaaroo kul.

23 Masi dirɲa ni nkuwawey kaatey,

nda waati kul hoolaa kaŋ ga hun borey do ka ni ganday.