75
Irkoy ti ciitikaa
1 Donkey boŋkoynoo ka woo don. Takaa kaŋ nda a ga doonoo woo don se i ga nee «Masʼa halaci.» Woo ti Asaf zabur foo. Dooni.
2 Ir ga albarka tee ma ne, Irkoy,
ir ga albarka tee ma ne.
Nʼga man ir, borey ga ni teegoy kayfantey deede.
3 Ni nee: «Nda waatoo too kaŋ ay nʼa kayandi,
ay ga ciiti nda fondaa.
4 Laboo ga jijiri nda nga gorokey kul,
agay no mʼa kayandi asaasoo ga.»
Kay-kayna
5 Borey kaŋ ga fooma, ay ga nee i se:
«War masi fooma», ka nee boro futawey se:
«War masi war boŋ jer beene!
6 War masi war boŋ jer beene,
wa fay nda hiɲešenday šenni nda bolsayyan!».
7 Zama manʼti dandi wala dangay,
wala saajoo ra jeryan ga hun.
8 Zama Irkoy ti ciitikaa,
a ga boro foo yeeti ganda, a ga affoo jer.
9 Zama poti goo Abadantaa kaboo ra,
a ga too met nda alaneb hari mooro
kaŋ ga hottu a ga boosu.
A gʼa mun. Boro laaley kaŋ goo aduɲɲa ra gʼa haŋ,
i gʼa haŋ, ba loti si cindi.
10 Agay, ay gʼa har waati kul,
ay ga don Yakuba Koyoo se.
11 Ay ga boro laaley hilley kul kayri,
boro šerrantey hilley ga jer.