76
Irkoy na wongoo benandi Siyoŋ koyraa ra
1 Donkey boŋkoynoo ka woo don. Dooni kaŋ bande hooray jinay linjikoyni goo. Woo ti Asaf zabur foo. Dooni.
2 Žuda borey ga Irkoy bay,
maaɲoo ga beeri Izirayel ra.
3 Nga tendaa sii kala Zalem*76.3 Žerizalem maa faa no, Šintinoo 14.18.,
nga gorodogoo sii kala Siyoŋ.
4 Nongoo woo ra a na biraw-izey kaŋ ra nuune goo,
nda koraa, nda takubaa nda wongoo say.
Kay-kayna
5 Irkoy, darža nda beeray goo ni ga
ka bisa tondi hondu kaŋ ra adabbawey goo kaŋ i gʼi hoo†76.5 tondi hondu kaŋ ra adabbawey goo kaŋ i gʼi hoo, Ebere šenni ra, almaganaa faa ti tondi hondey kaŋ ga bara waati kul, Šintinoo 49.26; Habaku 3.6..
6 Gaabikoyney koonandi, i kaŋ jirbi ra,
wongaari beerey kul albarkawey ben.
7 Yakuba Koyoo, waatoo kaŋ ni zahã i ga,
bari kaarukey nda baryey kaŋ jirbi komante ra.
8 Ni hinne no ma hunburandi!
May ma hin ka kay ni jine ni futuroo waati?
9 Ni goo beenaa ra nʼna ciitoo dunbu.
Laboo hunbur, a tee suk
10 waatoo kaŋ Irkoy tun ka ciiti,
nda ka laboo kul borey kaŋ ga taabi faaba.
Kay-kayna
11 Ba adamizey futuroo ga ni saabu.
Borey kaŋ cindi futuroo banda ga, nʼgʼi tee ni gamahawoo.
12 Wa meefur zaa Abadantaa, war Koyoo se,
war mʼi kaa!
Yala boro kul kaŋ gʼa kuubi kʼa bere
ma gomniyaŋ noo Hunburandikaa se!
13 A ga boŋkoyney hunsaroo dunbu,
hunburhaya no laboo kokoyey se.