77
Irkoy ti borey kaŋ torro bine yaynandikaa
1 Donkey boŋkoynoo ka woo don. Takaa kaŋ nda a ga doonoo woo don se i ga nee «Yedutun*77.1 Zaburey 39.1.». Woo ti Asaf zabur foo.
2 Ay gʼay jindoo jer ka kaati ka Irkoy cee,
ay gʼay jindoo jer ka Irkoy cee a ma haŋajer ya ne.
3 Han kaŋ ay goo binemarayyan ra, ay ga Abadantaa ceeci,
cijin here ay kaboo ga cindi šerreyan ra bila a ma dusu,
ay hundoo si yadda boro mʼay binoo yaynandi.
4 Nda ay hongu Abadantaa, ay ga duray.
Nda ay ga miile, ay binoo ga hun.
Kay-kayna
5 Nʼgʼay moɲey dii i ma hay cijinoo kul ra,
ay lakkaloo ɲaami, ay si yee ka bay haya kaŋ yʼa har.
6 Ay ga miile waati bisantey ga,
jiirey kaŋ bisa ga.
7 Ay ga honga dooney cijin here,
ay binoo ga miile,
ay lakkaloo ga nga boŋ hãa.
8 Ay Koyoo nkʼay fur hala abada wala?
A si kaa ka hinne ay ga wala?
9 Nga borohennataraa nka ben hala abada wala?
Šenni sii a se kaŋ a gʼa har ir se koyne wala?
10 Irkoy nka dirɲa ka alhormo tee ir se wala?
Nga futuroo ra, a nka si yee ka tamalla wala?
Kay-kayna
11 Ay nee: «Woo kaŋ gʼay torro ti,
Koy Jerantaa kabe gumaa nka barmay.»
12 Ay ga honga Abadantaa teegoyey,
ay ga honga teegoy kayfantey kaŋ nʼnʼi tee ka bisa.
13 Ay ga ni teegoyey kul har,
ay ga miile-miile ni teegoyey ga.
14 Ya Irkoy, ni fondaa manʼti kala henanyan,
may ti koyoo kaŋ ga beeri ka too Irkoy?
15 Ni ti Koyoo kaŋ ga kayfiyaŋ tee.
Nʼna ni gaaboo cebe dumey ra.
16 Ni na ni kabe albarkantaa ka ni jamaa day kʼi feeri
kaŋyaŋ ti Yakuba izʼarey nda Isufi izʼarey.
Kay-kayna
17 Ya Irkoy, harey dii ni!
Kaŋ harey dii ni, i hunbur.
Guusu beerey zinji-zinji.
18 Duulawey na hari doori,
beenaa hirroo na jinde kaataray,
ni biraw-izey deeši nongoo kul here.
19 Ni jiŋjiŋoo kaatiroo goo hewkuroo ra,
meliyaŋ ga gaay noo aduɲɲa se,
laboo jijiri hunburay se.
20 Nʼna ni fondaa kaa teekoo game,
nʼna ni bisadogoo kaa hari beerey game,
amma boro mana dii ni ceedogey.
21 Nʼna Musa nda Haruna ka ni jamaa gongu
sanda alman kur foo.