Ay jamaa, ma haŋajer agay ašariyaa se!

Wa war haŋaa gaaru ay miɲoo šenney se.

2 Ay gʼay miɲoo feeri ka yaasay foo har,

ay ga waati bisantey šenni tugantey har.

3 Woo kaŋ ir maarʼa,

woo kaŋ ir baabey nʼa deede ir se,

4 ir sʼa tugu ngi hayroo se,

ir mma Abadantaa teegoy saabantey,

nda nga gaaboo, nda nga kayfey kaŋ a nʼi tee filla i se.

5 A na seedetaray naŋ Yakuba borey game,

a na ašariya gorandi Izirayel boŋ,

kʼir baabey yaamar i mʼi bayrandi ngi izey se,

6 hala zamanoo kaŋ ga kaa izey mʼi bay,

i ga tun kʼi deede ngi izey se.

7 Takaa woo ra, Irkoy ra i ma ngi naanaa daŋ,

i masi dirɲa Irkoy teegoyey,

i ma nga yaamarey dii.

8 I masi tee sanda ngi baabey takaa,

zaman-ize hiɲešenda, turante,

zaman-ize kaŋ biney si šerre,

de mo i mana laadir Irkoy here.

9 Efrayim borey wongu jinay koyey kaŋ ga biraw kar

na duma bere wongoo zaaroo se.

10 I mana Irkoy amaanaa dii,

de mo i wanji ka hanga nga ašariyaa.

11 I dirɲa nga teegoyey,

nda haya kayfantey kaŋ a nʼi cebe i se.*78.9–11 Oze 6.4–7.

12 Ngi baabey jine a na haya kayfante tee

Misira gandaa ra, Sowaŋ koyraa laamaa ra.

13 A na teekoo fay ihinka kʼi deŋandi,

a na harey kayandi sanda cete.

14 A gʼi gongu nda duula zaari here,

cijinoo kul a gʼi gongu nda nuune gaay.

15 A na tondiyaŋ kayri saajoo ra

kʼi noo hari i ma haŋ haya kaŋ ga wasa i se,

ni mma nee guusu beeri hari.

16 Tondoo ra a na hariyaŋ fattandi,

a na hari zumandi sanda isayaŋ.

17 Amma i koy a ga ka zunubu tee a ga,

ka ture Koy Jerantaa ga labu kogaa boŋ.

18 I na Irkoy sii ngi biney ra

ka ngi boonay ŋaayanoo ceeci.

19 I šelaŋ Irkoy ga ka nee:

«Irkoy mma hin ka ŋaayan gorandi

ir se saajoo ra wala?»

20 Nga ne, a na tondoo kar, haroo doo,

isayaŋ dandi nongoo kul here,

a mma hin ka ŋaayan wala

ham noo nga jamaa se wala?

21 Woo se, kaŋ Abadantaa maarʼa, a futu,

nuune dii Yakuba borey ga,

nga futuroo kaŋ Izirayel boŋ,

22 zama i mana ngi naanaa daŋ Irkoy ra,

de i mana ngi boŋ talfi nga hallasiroo ra.

23 Ka gar a na beene duulawey noo yaamar,

a na beenaa miɲey feeri.

24 A na man zumandi i ga sanda ncirɲi i mʼa ŋaa,

a nʼi noo beenaa taasoo.

25 Affoo kul duu gaabikoyney ŋaahayaa,

a na ŋaayan sanba i se kaŋ gʼi wasa.

26 A na dandi hew tunandi beenaa ra,

nga gaaboo ka kate gurma hewoo.

27 A na ham zumandi i boŋ sanda kusaw

nda ciraw sanda teekowey labutaasoo,

28 a nʼi kaŋandi ngi kaloo ga,

ngi gorodogey kuubi-ka-beraa kul bande.

29 I ŋaa, i hanse ka kungu,

a nʼi noo ngi alhawaa.

30 Ngi alhawaa mana hun jina,

ngi ŋaahayaa goo miɲey ra,

31 kaŋ Irkoy futuroo kaŋ i ga,

a na gaabikoyniyaŋ wii i ra,

a na Izirayel soogey kaŋandi ganda.

32 Woo kul, i koy a ga ka zunubu tee,

i mana ngi naanaa daŋ nga teegoy kayfantey ra.

33 Woo se a na ngi jirbey benandi yaada ra

ka ngi jiirey benandi hunburay ra.

34 Waati kaŋ a ga baa kʼi wii, i gʼa ceeci,

i willi banda ka Irkoy ceeci.

35 Lakkaley zunbu kaŋ Irkoy ti ngi Tondoo,

kaŋ Irkoy Jerantaa ti ngi Feerikaa.

36 Amma i ceeci ka darga nda ngi miɲey,

i ga ngi deeney ka taari a se.

37 Ngi biney si hanse ka bara a bande,

i mana laadir nga amaanaa ra.

38 Amma nga kaŋ ga tamalla

na ngi laybey yaafa, a manʼi halaci.

Cee booboyaŋ a ga nga futuroo dii,

a mana naŋ nga futuroo kul ma fatta.

39 A hongu kaŋ i manʼti kala gaaham,

hew kaŋ ga koy a si willi kate.

40 Cee booboyaŋ i ga ture a ga saajoo ra.

Cee booboyaŋ i ga binoo hẽenandi saaji biboo ra.

41 I yee koyne ka Irkoy sii,

ka Izirayel Koy Henanantaa tooɲe.

42 I dirɲa nga gaaboo,

i dirɲa mo hanoo kaŋ a nʼi kaa torrokaa kaboo ra,

43 I dirɲa tammaasawey kaŋ a nʼi tee Misira,

nda kayfey kaŋ a nʼi tee Sowaŋ laamaa ra:

44 A na ngi isawey harey bere kʼi tee kuri,

nda ngi goorey harey mo, i mana hin kʼi haŋ.

45 A na hamniyaŋ sanba i ga kʼi ɲama

nda kormotoyaŋ kaŋ nʼi halaci.

46 A na ngi laboo duuraa taŋ ndoo-izey se,

a na ngi kabe goyoo taŋ ndoowey se.

47 A na gari ka ngi alaneb faarey wii,

a na ncirɲi beeriyaŋ ka ngi jeejayɲaŋey wii.

48 A na gari ka ngi adabbawey halaci,

ka meli ka ngi alman kurey halaci.

49 A na nga futay beeroo zumandi i ga,

nda laalay, nda almasiiba, nda torro,

ka dontokawyaŋ sanba i ga nda boneyaŋ.

50 A na nga futuroo noo fondo,

a mana ngi hundey hallasi buuyan ra,

a na ngi hunayaney taŋ sorfaa se.

51 A na gunde jinaw kul kaŋ goo Misira kar kʼi wii,

a na ngi gaaboo izey wii Šam gorodogey ra.

52 A na nga jamaa ka koy sanda alman buuna,

a nʼi gongu sanda alman kur kaŋ goo saajoo ra.

53 A nʼi ka koy lakkalkanay ra, haya kul manʼi hunburandi,

teekoo gum ngi iberey ga.

54 A nʼi ka koy nga ganda henanantaa ra,

tondi hondoo woo here kaŋ nga kabe gumaa nʼa tee nga mayraa.

55 A na dumiyaŋ gaaray i jine

ka gandaa zamna kʼa tee ngi tuboo,

ka Izirayel alkabiilawey gorandi ngi hukkumey ra.

56 Amma i na Irkoy Jerantaa sii ka ture a ga,

i mana nga seedetarawey dii.

57 I hun a cire, i mana laadir sanda ngi hayragey,

i šiiri sanda biraw kaŋ si goy boryo.

58 I nʼa futandi nda ngi tooru ganadogey,

i na canse tunandi a ra nda ngi tooru assuurawey.

59 Irkoy maa, a futu,

a hanse ka wanji Izirayel ga.

60 A na Silo koyraa gorodogoo naŋ

hukkumoo kaŋ ra a cindi adamizey game.

61 Seedetaraa sundukoo kaŋ ti nga hinoo nda nga daržaa tammaasaa,

a nʼa naŋ nga iberey kabey ra i mʼa ka koy tamtaray.†78.61 Samiyel 1na 4.4–22.

62 A na nga jamaa noo takuba se,

a futu nga tuboo ga.

63 Nuune na ngi aru soogey wii,

ngi woy soogey mana duu beeray.

64 Ngi sargari juwalkey, takuba nʼi kaŋandi,

ngi woyey kaŋ kurɲey buu mana hẽe.

65 Abadantaa tun sanda boro kaŋ cindi jirbi ra,

sanda wongaari kaŋ alaneb hari moora nʼa suwandi.

66 A na nga nkuwawey kar i ma yee ganda,

a na haawi kʼi kar hala abada.

67 A wanji Isufi hugoo borey ga,

a mana Efrayim alkabiilaa suuba.

68 A na Žuda alkabiilaa suuba,

Siyoŋ tondi hondoo kaŋ a ga bagʼa.

69 A na nga nongu henanantaa cin kʼa jer,

sanda laboo kaŋ a nʼa gorandi hala abada.

70 A na nga tamoo Dawda suuba,

a nʼa kaa alman kurdogey ra.

71 A nʼa zaa kʼa kaa almaney kaŋ ga nan bande

ka nga jamaa kaŋ ti Yakuba borey kur,

nda Izirayel kaŋ ti nga tuboo.

72 Dawda nʼi kur nda bine laadirante,

a nʼi gongu nda lakkal.