Ya Irkoy, dumiyaŋ na ni tuboo dii,

i na ni hugu henanantaa žiibandi,

i na Žerizalem tee tondi zuku.

2 I na ni tamey bukawey nondi

i ma tee ŋaayan beenaa cirawey se

ka ni ganakey hamoo noo laboo adabbawey se.

3 I na ngi kurey doori sanda hari

Žerizalem kuubi-ka-beraa bande,

boro sii no kaŋ gʼi fiji.

4 Ir tee kaynahaya ir taalammey se,

haarayhaya nda ɲooɲohaya borey se kaŋ gʼir kuubi ka bere.

5 Abadantaa, hala waati foo no ni futuroo kaŋ ga duumi ga ben ir bande?

Hala waati foo no ni canseroo

kaŋ ga tona sanda nuune ga ben ir bande?

6 Ni futuroo doori dumey boŋ

kaŋ si ni bay, nda kokoytarawey boŋ

kaŋ si ni maaɲoo cee.

7 Zama i na Yakuba borey gon

ka ngi gorodogoo say.

8 Masi yee koyne ka hongu ir laybu bisantey!

Yala ni tamallaa ma kaa nda cahãyan ka kay ir jine!

Zama ir hanse ka kayna.

9 Ir faaba, ir Hallasikaa Irkoy,

ni maaɲoo daržaa se!

Ir kaa kabe ra, ir zunubey yaafa,

ni maaɲoo sabbu se!

10 Macin se gandawey ga nee:

«Man ngi Koyoo?»

Yala ir jine gandawey ma bay kaŋ borey kaŋ na ni tamey kuroo mun,

nʼga ngi kuroo alhakoo kaa i ra!

11 Yala ma maa kasa-izey torrowey se!

Ni kabe albarkantaa ma borey kaŋ

i nʼi kayandi wiiyan se soolam.

12 Ir Koyoo, ir taalamma gandawey kaŋ na ni kaynandi,

i banandi hala cee iyye ngi kaynandiyanoo se.

13 Amma ir kaŋ ti ni jamaa nda ni alman kuroo kaŋ nʼga kur,

ir ga albarka daŋ ma ne hala abada,

zaman ka kaa zaman ir ga ni saaburoo šifa.