80
Irkoy ti Izirayel kurkaa
1 Donkey boŋkoynoo ka woo don. Dooni kaŋ bande kurbu linji iddukoyni goo. Seedetaray. Woo ti Asaf zabur foo.
2 Haŋajer, Izirayel Kurkaa,
ni kaŋ na Isufi borey gongu sanda alman kur!
Ni kaŋ ga goro almalaykey kaŋ se i ga nee šerib boŋ,
ni gaayoo ma dii garaw.
3 Ni gaaboo kaataray Efrayim,
nda Benžameŋ, nda Manase alkabiilawey jine,
ma kaa kʼir hallasi!
4 Ya Irkoy, ir yee katandi ir dogey ra!
Ni ndumoo annuuraa daŋ ir ga, de ir ga hallasi.
5 Abadantaa, Aduɲɲakoyoo,
hala waati foo ni futuroo ga ben
ni jamaa ŋaarayroo ga?
6 Nʼga ngi mundawey tee i se ngi ŋaahayaa,
nʼgʼi haŋandi ngi mundawey hala i ma too met.
7 Nʼgʼir tee haya kaŋ gʼir taalammey ga yenje,
ir iberey ga haaru ir ra.
8 Aduɲɲakoyoo, ir willi katandi!
Ni ndumoo annuuraa daŋ ir ga, de ir ga hallasi!
9 Nʼna alanebɲaa dogu ka hun Misira,
nʼna gandayaŋ gaaray, nʼnʼa duma.
10 Nʼna nga gandaheroo hanse,
a na nga linjey daaru, a na gandaa too.
11 Nga biyoo na tondi hondey daabu,
nga tuuri kabey ga hima nda Irkoy sedere tuurey*80.11 Irkoy sedere tuurey, Ebere šenni ra, almaganaa faa ti sedere tuurey kaŋ ga bisa i kul..
12 Tuuroo kabey ga koy hala teekoo ra,
tuuri kabeyaŋ ga zay ka koy hala Efrat isaa ra.
13 Macin se nʼna fun kaa nga cetewey ra,
hala nongu kaŋ ra bisakey ga nga izey kosu?
14 Ganji nbirŋaa gʼa hasara,
ganjihoogawey gʼa tee ngi kurdogoo.
15 Aduɲɲakoyoo, ay gʼa wiri ni ga, ma willi kate!
Ni kaŋ goo beenaa ra, fuuni ka dii, huga nda alanebɲaŋoo woo!
16 Tuuroo kaŋ ni kabe gumaa nʼa duma hawgay,
nda izʼaroo kaŋ ra nʼna albarka daŋ.
17 I na tuuroo ton ka nuune daŋ a ra, i nʼa dunbandi,
ni zahãyanoo jine i ga dere.
18 Yala ni kaboo ma bara aroo ga kaŋ goo ni kabe gumaa ga,
adamizoo kaŋ ni hunday ka albarka daŋ a ra!
19 Nda woo teendi, ir si yee kʼir boŋ taa ni kone.
Naŋ ir ma huna, woo ra ir ga ni maaɲoo cee.
20 Abadantaa, Aduɲɲakoyoo, ir yee katandi ir dogey ra!
Ni ndumoo annuuraa daŋ ir ga, de ir ga hallasi!