81
Boro ga hima ka haŋajer Irkoy se
1 Donkey boŋkoynoo ka woo don. Dooni kaŋ bande Gat koyraa nzarka goo. Woo ti Asaf zabur foo.
2 Wa kaati ka yafarhã Irkoy se, nga ti ir gaaboo,
wa kaati nda ɲaali Yakuba Koyoo se!
3 Wa suboo don ka dunduŋ hẽenandi,
wa kuntiji henna nda kurbu kar!
4 Wa hilloo hẽenandi handu taagaa ra,
handu kaaraa ir jingaroo hane.
5 Zama yaamar no Izirayel se,
Yakuba Koyoo hantum kaŋ kayandi no.
6 Seedetaray no kaŋ a nʼa tee Isufi borey se
waatoo kaŋ a fatta ka Misira gandaa wongu.
Ay ga maa jinde kaŋ ay sʼa bay, a nee:
7 «Ay na jeraw zaa jesey ga,
kabey hun kokondaa cire.
8 Ni wurru waatoo kaŋ nʼga torro, ay na ni feeri,
ay na ni zaabi jiŋjiŋoo duulaa ra.
Ay na ni sii Meriba harey jere.
Kay-kayna
9 Ay jamaa Izirayel, haŋajer, ay ga ni teje.
Izirayel, nda a gar ba ni mma haŋajer ya ne!
10 Masi yadda koy tana ma bara ni do!
Masi sujudu koy yaw se!
11 Agay ti Abadantaa, ni Koyoo,
woo kaŋ na ni fattandi ka hun Misira gandaa ra.
Ni miɲoo feeri ka boori, ay gʼa too.
12 Amma ay jamaa mana haŋajer ay šennoo se,
Izirayel mana yadda ay ga.
13 Woo se, ay nʼi naŋ i ma hayaa tee kaŋ kan biney se,
i na ngi boŋ hoyraa gana.
14 Nda a gar ba ay jamaa mma haŋajer ya ne,
nda a gar ba Izirayel mmʼay fondaa gana,
15 sohõ da kala ya tun ngi iberey se,
ay ga bere ngi torrokey ga.»
16 Borey kaŋ ga konna Abadantaa ga yee a se ganda,
ngi zukandoo waatoo si ben hala abada.
17 Ya Izirayel huna nda alkama henna
kʼa kungandi nda yuu kaŋ hun tondi ra.