2 Ya Irkoy, masi hunanzam,

masi dangay, masi tee suk, ya Irkoy!

3 Zama sohõ da, ni iberey goo ma kosongu kar,

wey kaŋ konna ni ga ngi boŋey jer.

4 I ga marga ka dabari futu haw ni jamaa ga,

i ga hawandifutay borey ga kaŋ talfandi ni ga.

5 I ga nee: «Wa kaa, ir ma ngi gandaa derandi kʼa kaa gandawey ra,

hala boro masi yee ka honga Izirayel maaɲoo.»

6 I ga tee bine foo ka hawandifutay,

ka amaana tee ka tee ni ga affoo.

7 I manʼti kala Edom borey, nda Isimayel borey,

nda Mowab borey, nda Hagri borey,

8 nda Gebal borey, nda Amoŋ borey, nda Amalek borey,

nda Filisti borey, nda Tir koyraa gorokey.

9 Asiri borey mo tonton i ga,

i ga kabe daŋ Lotu izey se.

10 Takaa tee i se kaŋ nʼnʼa tee Majaŋ gandaa se,

sanda woo kaŋ duu Sisera nda Yabin Kišoŋ haroo miɲoo ga!

11 I halacandi En-Dor koyraa ra,

i tee žiibi laboo se.

12 Takaa kaŋ nʼnʼa tee Oreb nda Zeb se tee ngi boŋkoyney se,

ka takaa follokaa tee ngi jineborey kul se

sanda woo kaŋ nʼnʼa tee Zeba nda Salmunna se.

13 Borey no kaŋ nee: «Ir ma Irkoy gorodogey dii

kʼi tee ir wane.»

14 Ay Koyoo, i tee sanda hewkur,

sanda subu kaŋ hewoo gʼa zaa.

15 Sanda takaa kaŋ nda nuune ga hawsaa ton,

sanda takaa kaŋ nda nuune deene ga tondi hondey diinandi,

16 takaa din da i gaarandi nda ni kusaa,

mʼi hunburandi nda ni hew futaa.

17 Abadantaa, i haawandi

hala i ma ni maaɲoo ceeci.

18 Yala waati kul i ma haw i ma hunbur,

i ma haw, i ma halaci.

19 Woo ra i ga bay kaŋ ni kaŋ maaɲoo ti Abadantaa,

ni hinne ti Koy Jerantaa laboo kul boŋ.