84
Irkoy ganakey ga baa Irkoy hugoo
1 Donkey boŋkoynoo ka woo don. Dooni kaŋ bande Gat koyraa nzarka goo. Woo ti Kora izey zabur foo.
2 Abadantaa, Aduɲɲakoyoo,
ni gorodogey ga hanse ka kan!
3 Ay hundoo ga kunfa, a ga hanse ka nga boŋ farandi
hala ya huru Abadantaa hugoo batumawey ra,
ay binoo nda ay hamoo ga kaati ka Irkoy hunantaa cee.
4 Ba takirya ga duu hugu,
garaasa-garaasa goo nda teji kaŋ ra a ga nga izey daŋ
ni sargari tonadogey jere, Abadantaa, Aduɲɲakoyoo,
ay kokoyoo, ay Koyoo.
5 Borey duu gomni kaŋ ga goro ni hugoo ra!
I ga ni saabu waati kul.
Kay-kayna
6 Boraa duu gomni kaŋ ni ti nga gaaboo,
fondo šerranteyaŋ žeerandi binoo ra.
7 Ba waati kaŋ i ga Tuuriɲaŋey*84.7 Tuuriɲaŋey, Ebere šenni ra, almaganaa faa ti Mundawey. gooroo deŋ,
i gʼa bere kʼa tee hari kaydoo,
de mo ncirɲi jinawey gʼa too nda albarka.
8 Ngi gaaboo mma koy de a ga tonton,
i kay Irkoy jine Siyoŋ koyraa ra.
9 Abadantaa, Aduɲɲakoyoo, maa ay ŋaarayroo se,
haŋajer ya ne, Yakuba Koyoo!
Kay-kayna
10 Ya Irkoy, guna, ni kaŋ ti ir koraa†84.10 guna, ni kaŋ ti ir koraa, Ebere šenni ra, almaganaa faa ti dii ir koraa.,
ni suubantaa kaŋ yonandi ndumoo guna!
11 Ka zaari foo tee ni hugoo batumawey ra
baa ka zaari zenber (1.000) tee nongu tana ra.
Ya kay ay Koyoo hugoo jindoo ga,
ay bagʼa nda ya goro boro laala hukkumey cire.
12 Zama Abadantaa Irkoy manʼti kala wayna nda koray,
Abadantaa ga anneema nda darža noo,
a si gomni kul wanji
borey se kaŋ ga dira nda laadirtaray.
13 Abadantaa, Aduɲɲakoyoo,
boraa duu gomni kaŋ ga nga boŋ talfi ni ga.