2 Ya Abadantaa, nʼna alhormo tee ni gandaa se,

nʼna Yakuba borey willi kate kʼi kaa tamtaray ra.

3 Nʼna ni jamaa layboo yaafa i se,

nʼna ngi zunubey kul daabu.

4 Nʼna ni futuroo kul naŋ,

ni yee ni futay beeroo se banda.

5 Ir Hallasikaa Irkoy, mʼir willi katandi ni ga!

Ni binoo masi yee ka tun ir ga.

6 Ni futuroo mma cindi ir ga hala abada wala?

Ni futuroo mma cindi ir ga zaman ka kaa zaman wala?

7 Manʼti ni da no ma kaa kʼir hunaroo taagandi

hala ni jamaa ma ɲaali ni ra wala?

8 Abadantaa, ni borohennataraa cebe ir se,

de mʼir noo ni hallasiroo!

9 Ay ga haŋajer woo kaŋ Irkoy Abadantaa gʼa har se,

zama a si šelaŋ kala nga jamaa nda nga ganakey alaafiyaa se,

amma i masi willi ka tee lakkal jaŋante.

10 Cimi no, nga hallasiroo ga man borey kaŋ ga hunbur a,

daržaa ma tabati ir gandaa ra.

11 Borohennataraa nda cimoo ga cere kubay,

šerretaraa nda alaafiyaa ga cere summu.

12 Cimoo ga tun laboo ra,

šerretaraa goo beenaa ra, a ga fuuni ganda.

13 Abadantaa ga gomni tee,

de ir laboo ga nga duuraa noo.

14 Šerretaraa ga dira a jine

ka fondaa hanse a se.