Abadantaa, ni haŋaa gaaru, ay zaabi!

Zama agay, talka ti agay, alfukaaru ti agay.

2 Ay hunaroo hawgay, zama ay manʼti kala ni ganakaw!

Ni kaŋ ti ay Koyoo, ay hallasi, agay, ni tamoo,

agay kaŋ nʼay boŋ talfi ni ga!

3 Ay Koyoo, alhormo tee ya ne!

Zama ni no ay ga ni cee zaaroo kul.

4 Agay, ni tamoo hundoo ɲaalandi,

ay Koyoo, ay gʼay binoo manandi ni.

5 Zama ni, ay Koyoo, nʼga boori, nʼga yaafa,

nʼga borohennataray beeri tee borey kul se kaŋ ga ni cee.

6 Abadantaa, haŋajer ay ŋaarayroo se,

maa ay suurandiyaney.

7 Han kaŋ ay goo binemarayyan ra, ay ga ni cee,

zama nʼgʼay zaabi.

8 Ay Koyoo, koyey ra, ni cine koy sii no,

ni teegoyey cine sii no.

9 Ay Koyoo, gandawey kul kaŋ nʼnʼi tee

ga kaa ka sujudu ni jine

ka ni maaɲoo beerandi.

10 Zama nʼga beeri, nʼga kayfiyaŋ tee,

ni hinne ti Irkoy.

11 Abadantaa, ay cawandi ni fondaa.

Ay ga dira ni cimoo bande.

Ay binoo marga a ma hunbur ni maaɲoo.

12 Ay Koyoo, Irkoy, ay ga ni saabu nda ay binoo kul,

ay ga ni maaɲoo beerandi hala abada.

13 Zama ni borohennataraa ga beeri ay here,

nʼgʼay hundoo kaa alaahara guusoo ra.

14 Ya Irkoy, boro deene beeriyaŋ tun ya ne,

boro binekogayaŋ jamaa ga ceeci ngi mʼay hundoo kaa,

i si kula ni ra.

15 Amma ni, ay Koyoo, ni manʼti kala Koy

kaŋ ga tamalla, a ga alhormo tee,

nʼsi cahã ka futu, ni borohennataraa nda ni laadirtaraa ga beeri.

16 Bere ay here ka alhormo tee ya ne,

agay, ni tamoo, ay noo ni gaaboo,

ay hallasi, agay, ni koŋŋaa izʼaroo!

17 Tammaasa foo ka cebe ya ne ay nafaa se!

Yala borey kaŋ ga konna agay ma dii a, i ma haw!

Zama ni, Abadantaa no mʼay soolam kʼay binoo yaynandi.