Ir Koyoo, ni, ni tee ir se gorodoo

zaman ka kaa zaman.

2 Za tondi hondey mana daŋandi aduɲɲa ra,

za laboo nda aduɲɲa mana bangay,

za alwaatey kul ra hala abada ni ti Irkoy.

3 Nʼga boro willi laboo ra,

ni nee: «Adamizey, wa willi kate!»

4 Zama jiiri zenber foo (1.000) ga tee ni moɲey cire

sanda bi zaaroo kaŋ bisa,

sanda cijinoo dimma waati foo.

5 Nʼga adamizey haabu kʼi benandi,

i ga hima nda dusungu jirbi.

Subbaahoo ra i ga hima nda subu kaŋ ga zay,

6 a ga boosu, a ga beeri,

aluulaa ra, a ga kukuši, a ga kogu.

7 Ir ga halaci ni futuroo maaganda,

ni binetunyanoo gʼir hunburandi.

8 Nʼgʼir laybey daŋ ni jine,

ni ndumoo gaayoo gʼir haya tugantey fatawandi.

9 Zama ir zaarey ga ben ni futuroo maaganda,

ir gʼir jiirey benandi sanda hunsar.

10 Ir aloomuroo ga koy too jiiri woyye (70),

boro yakuwantey jiiri woyyaaha (80),

woo se ngi bolsayyanoo si kate kala bone nda ifutu,

zama hunaroo ga bisa, ir ga tee sanda hew.

11 May no ma ni futuroo gaaboo bay?

May ma ni binetunyanoo bay sanda ni hunburaa?

12 Ir cawandi ir mʼir aloomuroo zaarey kabu

hala ir biney ma dira nda lakkal.

13 Abadantaa, willi kate! Hala waati foo no woo ga ben?

Hinna ni tamey ga.

14 Ir kungandi nda ni borohennataraa za subbaahi,

woo ra ir ga ɲaali ka yafarhã ir aloomuroo kul ra.

15 Ir ɲaalandi ka sawa nda waatey hinnaa

kaŋ nʼnʼir taabandi,

ka sawa nda jiirey hinnaa kaŋ ir nʼa tee bone ra.

16 Ni teegoyey cebe ni tamey se

ka ni beeraa cebe ngi izey se.

17 Yala ir Koyoo Irkoy albarkaa ma bara ir ga!

Mʼir kabe goyey tabatandi ir se!

Nhuu, ir kabe goyey tabatandi!