1 Boro kaŋ na Koy Jerantaa tee nongoo kaŋ ra a ga tugu,

boraa ga goro Hini-kul-koyoo biyoo ra.

2 Ay nee Abadantaa ga kaŋ nga ti nongoo kaŋ ga ay gʼay boŋ talfi

nda ay nongu gaabantaa,

ay Koyoo kaŋ ra ay nʼay naanaa daŋ.

3 Zama nga no ma ni kaa kumsay hirrikaa kumsaa cire

nda sorfaa kaŋ ga boro halaci ra.

4 A ga ni gum nda nga fatawey hinbirey,

nʼga duu nongoo kaŋ ra nʼga tugu nga fatawey cire,

nga laadirtaraa manʼti kala koray beeri nda guuru darbay.

5 Nʼsi hunbur hayey kaŋ ga boro hunburandi cijin here,

nda mo biraw-izoo kaŋ warrandi zaari here,

6 nda mo sorfaa kaŋ ga dira kubaa ra,

nda mo wirci laalaa kaŋ ga kara zaarikayaa ra.

7 Ba nda boro zenber (1.000) kaŋ ni jeroo ga,

boro zenber woy (10.000) kaŋ ni kabe gumaa ga,

baffoo si duu ni.

8 Guna nda ni moɲey hinne,

de nʼga dii banaa kaŋ boro laaley ga duu a.

9 Zama ni, Abadantaa ti nongoo kaŋ ra ay gʼay boŋ talfi.

Nʼna Koy Jerantaa tee ni gorodogoo.

10 Bone kul si duu ni,

balaawu kul si man ni gorodogoo.

11 Zama a ga nga almalaykey yaamar

i ma ni hawgay nongu kul kaŋ ra ni koy.

12 I ga ni zaa ngi kabey ra

hala ni cewoo masi koy cabu tondi ga.

13 Nʼga dira ganjihayla nda firsaw boŋ,

nʼga ganjihayla soogo nda teekoo adabba beeri taama.

14 Irkoy nee: «Zama de a na nga boŋ haw ay ga,

woo se ay gʼa soolam,

ay gʼa sutura, zama a gʼay maaɲoo bay.

15 A gʼay cee, ay gʼa zaabi.

Waati šenda ra, agay hunday goo a bande,

ay gʼa kaa a ra, ay gʼa beerandi.

16 Ay gʼa noo aloomur kuku,

de mo ay gʼa cebe ay hallasiroo.»