2 A ga boori boro ma Abadantaa saabu,

ka don ni maaɲoo se, Koy Jerantaa!

3 Ni borohennataraa ma harandi za subbaahi,

ni laadirtaraa ma harandi cijinoo ra,

4 hooray jinay linji woykoyni (10) nda kurbu ga,

nda kuntiji jinde ga.

5 Ya Abadantaa, ni teegoyey gʼay ɲaalandi.

Ay ga ɲaali ka kaati ni kabe goyey maaganda.

6 Abadantaa, ni teegoyey ga beeri,

ni miilewey ga hanse ka guusu!

7 Saama sʼa bay,

lakkal jaŋante si faham a se.

8 Boro futu ga tun ka boobo sanda subu kaŋ ga zay,

borey kul hayey kaŋ ga šerretaray jaŋay tee ga gooru sanda subu kaŋ ga boosu,

amma ngi kokoroo manʼti kala hala i ma halaci waati kul.

9 Amma ni, hala abada ni mma jer beene, Abadantaa!

10 Zama sohõ da, ni iberey, Abadantaa,

ni iberey ga halaci,

borey kaŋ ga šerretaray jaŋay tee ga say-say.

11 Nʼgʼay boŋoo jer sanda ganjihaw boŋoo,

nʼna jii hew kaana kʼay yon.

12 Ay moɲey ga dii agay nkuwawey,

de ay haŋawey ga maa

goy futu teekey se kaŋ ga kay ya ne.

13 Boro šerrantey ga tonton ka koy jine sanda teenayɲaa,

i ga beeri sanda Libaŋ gandaa sedere tuuri.

14 I ga hima nda tuuri kaŋ dumandi Abadantaa hugoo ra,

i ga zay ka boosu ir Koyoo hugoo batumawey ra.

15 Ba ngi žeenay ga i ga ize tee,

i ga gani, fitawey ga firzi

16 ka bayrandi kaŋ Abadantaa ga šerre.

Nga ti ay Tondoo, haya kul sii a ra kaŋ si šerre.