1 Faasakaa Irkoy,

Abadantaa, faasakaa Irkoy, ni annuuraa cebe!

2 Tun, laboo ciitikaa,

ka hundibeerey bana ka sawa nda ngi teegoyey!

3 Abadantaa, hala waati foo no boro laaley,

hala waati foo no boro laaley ga koy a ga ka ɲaali?

4 I ga deenebeeray ka šelaŋ nda moɲɲay,

borey kul kaŋ ga šerretaray jaŋay tee ga bolsay.

5 Abadantaa, i ga ni jamaa kankam,

i ga borey kaŋ ti ni tuboo zarabi.

6 I ga woyoo kaŋ kurɲoo buu nda taabušoo wii,

i ga alyatimey halaci.

7 I ga nee: «Abadantaa si dii,

Yakuba Koyoo si faham.»

8 Saamey kaŋ goo jamaa ra, wa faham!

Lakkal jaŋantey, hala waati foo no war ga duu lakkal?

9 Boraa kaŋ na boro noo haŋa nka si maa wala?

Boraa kaŋ na moo hanse nka si dii wala?

10 Boraa kaŋ ga dumey aladabu nka sʼi zukandi wala,

nga kaŋ ga bayray cawandi adamizey se?

11 Abadantaa ga adamizey miilewey bay,

a ga bay kaŋ hew de no.

12 Abadantaa, boraa duu gomni kaŋ nʼgʼa aladabu,

kaŋ nʼgʼa waanandi ni ašariyaa,

13 kʼa noo hunanzamay bone zaari hane

hala guusu ma fanšandi boro laala se.

14 Zama Abadantaa si nga jamaa fur,

a si nga tuboo naŋ,

15 zama ciitoo bere cimi here,

borey kul kaŋ biney ga šerre ga hanga a.

16 May no ma kay ya ne goy futu teekey jine?

May no ma kara ay ga ka borey gandu kaŋ ga šerretaray jaŋay tee?

17 Nda a gar Abadantaa nka manʼti ay faabakaa,

haya kayna ka ganji ay hundoo ma koy nongu dangayantaa ra.

18 Nda ay nee: «Ay cewey ga tanši»,

Abadantaa, ni borohennataraa ra nʼnʼay faaba.

19 Waati kaŋ ay alhuzuney boobo,

nʼnʼay binoo yaynandi kʼa too nda ihenna.

20 Nʼga hin ka kara ciiti dunbukaw laaley ga,

ngi kaŋ ga bone tee ašariyaa maaɲoo ga wala?

21 I ga marga boro šerrantaa hundoo ga,

de i ga boraa kaŋ mana haya kul tee kuroo mun.

22 Amma Abadantaa ti ay nongu gaabantaa,

ay Koyoo ti Tondoo kaŋ ti nongoo kaŋ ra ay gʼay boŋ talfi.

23 I ga ngi šerretaray jaŋaa kaŋandi i boŋ,

ka ngi goy futawey kʼi halaci,

Abadantaa, ir Koyoo gʼi halaci.