1 Wa kaa, ir ma kaati nda ɲaali Abadantaa se,

ir ma yafarhã ir hallasiroo Tondoo se!

2 Ir ma koy kay jinoo ra nda albarka daŋyan,

ir ma kaati nda ɲaali ka baytiyaŋ don a se!

3 Zama Abadantaa manʼti kala Koy beeri,

Kokoy beeri no kaŋ goo koyey kul boŋ.

4 Laboo guusu beerey sii kala kaboo ra,

tondi hondu boŋey manʼti kala nga wane.

5 Teekoo ti nga wane, nga kʼa tee,

labu kogaa mo, nga kabey kʼa hanse.

6 Wa kaa, ir ma sujudu, ir ma gunguma,

ir mʼir kanjey sonbu Abadantaa jine kaŋ nʼir tee.

7 Zama nga ti ir Koyoo,

ir ti jamaa kaŋ a gʼa kur,

alman kuroo kaŋ kaboo gʼa gongu.

Hõ, nda war ga maa Irkoy jindoo,

8 war masi war biney šendandi

sanda takaa kaŋ nda a teendi Meriba,

sanda takaa kaŋ nda a teendi Masa zaaroo hane saajoo ra*95.8 Fattaroo 17.1–7; Kabuyaney 20.1–13.

9 kaŋ ra war baabey nʼay sii kʼay guna,

ba kaŋ se i dii ay teegoyey.

10 Jiiri woytaaci (40) kaŋ zamanoo woo borey si kan ya ne,

ay nee: «Jama no kaŋ biney dere,

i sʼay fondawey bay.»

11 Ay futuyanoo ra ay žee ka nee:

«Abada i si huru ay hunanzamoo ra!»