1 Wa dooni taaga don Abadantaa se,

laboo kul cere ra, ma don Abadantaa se!

2 Wa don Abadantaa se ka maaɲoo beerandi,

zaari kul war ma alhabaroo har

kaŋ ti nga ti Hallasikaa.

3 Wa nga daržaa har dumey kul game,

wa nga goy kayfantey har gandawey kul ra.

4 Zama Abadantaa ga beeri, a ga hima nda saabuyan,

a ga hunburandi ka bisa koyey kul.

5 Zama jamawey kul koyey manʼti kala taari koyyaŋ,

amma Abadantaa ka beenaa tee.

6 Beeray nda darža manʼti kala nga wane,

hinay nda dawla goo nga nongu henanantaa ra.

7 Jamawey alaayan beerey kul, wa beeray nda hini daŋ Abadantaa se,

wʼi daŋ a se!

8 Wa Abadantaa noo nga maaɲoo daržaa,

wa kate gomniyaŋ, wa huru Abadantaa hugoo batumawey ra.

9 Wa sujudu Abadantaa se kaŋ henanyanoo ga dii garaw.

Laboo kul borey ma jijiri Abadantaa jine.

10 Wa nee dumey se kaŋ Abadantaa ti Kokoy,

aduɲɲa ga kay nga dogoo ra, a si ɲuuti.

A ga jamawey ciiti nda fondaa.

11 Yala beenaa ma ɲaali! Laboo ma farhã,

yala teekoo nda haya kul kaŋ goo a ra ma dunduŋ!

12 Yala hawsaa nda haya kul kaŋ goo a ra ma ɲaali kaati beeri tee!

Waatoo din hawsaa tuurey kul ga kaati nda ɲaali

13 Abadantaa jine, zama a goo ma kaa,

zama a goo ma kaa ka laboo ciiti,

a ga aduɲɲa ciiti nda šerretaray,

a ga nga cimoo ka jamawey ciiti.