1 Abadantaa ti Kokoy!

Yala laboo ma yafarhã,

yala gungu boobey ma ɲaali!

2 Duula nda kubay koma gʼa kuubi kʼa bere,

šerretaray nda cimi ti nga kokoytaraa asaasoo.

3 Nuune ga dira a jine

ka nga nkuwawey ton nongu kul here.

4 Nga meley ga aduɲɲa noo gaay,

laboo ga dii a, de a ga jijiri.

5 Tondi hondey ga menne sanda suma Abadantaa jine,

laboo kul Koyoo jine.

6 Beenaa ga nga šerretaraa har,

jamawey kul ga dii nga daržaa.

7 Tooru ganakey kul

kaŋ ga fooma nda ngi koyey ga haw.

Koyey kul, wa sujudu a jine!

8 Siyoŋ koyraa ga maarʼa, a ga ɲaali,

Žuda gandaa koyrawey goo yafarhã ra

ni ciitey maaganda se, Abadantaa.

9 Zama ni, Abadantaa, ni ti Koy Jerantaa laboo kul boŋ,

ni hanse ka jerandi koyey kul boŋ.

10 War kaŋ ga baa Abadantaa, wa konna ifutu!

A ga nga ganakey hunaroo hawgay,

a gʼi kaa boro laaley kabey ra.

11 Gaay sayandi boro šerrante se,

ɲaali sayandi borey se kaŋ biney ga šerre.

12 Boro šerrantey, wa ɲaali nda Abadantaa,

wa nga maa henanantaa saabu!