Wa dooni taaga don Abadantaa se,

zama a na kayfiyaŋ tee.

Nga kabe gumaa nda nga jese henanantaa nʼa noo a ma hin.

2 Abadantaa na nga hallasiroo cebe,

a na nga šerretaraa kaarandi gandawey moɲey se.

3 A hongu Izirayel hugoo borey

ka nga borohennataraa nda nga laadirtaraa cebe i se,

Laboo kanjey kul dii ir Koyoo hallasiroo.

4 Laboo kul, wa kaati nda ɲaali Abadantaa se!

Wa ɲaali kaatiyaŋ tee ka don a se!

5 Wa kuntiji kar Abadantaa se,

wa kuntiji hẽenandi!

6 Wa laati beeriyaŋ nda hilli jindeyaŋ kar

ka kaati nda ɲaali Kokoyoo Abadantaa jine!

7 Yala teekoo ma dunduŋ, nga nda haya kul kaŋ goo a ra,

aduɲɲa nda boro kul kaŋ goo a ra.

8 Yala isawey ma kobi,

yala ngi bande tondi hondey ma kaati nda ɲaali!

9 I ma woo tee Abadantaa jine, zama a ga kaa ka laboo ciiti,

a ga aduɲɲa ciiti nda šerretaray,

a ga jamawey ciiti nda fondaa.