101
Kokoy ga allaahidu zaa kaŋ nga ga laama nda cimi
Woo ti Dawda zabur foo.
Ay ga don ka borohennataray nda cimi har.
Abadantaa, ni se ay ga don.
 
Ay ga gaabandi ka dira fondo šerrante ra.
Waati foo no nʼga kaa ay do?
Ay ga dira nda bine henanante ay borey game.
Ay si haya futu kul daŋ ay moɲey cire.
Ay ga konna teegoy laaley
kaŋ borey kaŋ hun fondaa boŋ gʼi tee,
i masi man agay.
Bine šiira ga mooru ay ga,
ay si ifutu bay.
Boro kul kaŋ na nga cinaa maaɲoo hasara tuguyan ra,
ay ga koyoo halaci.
Fooma nda binebeeray,
ay sʼi muɲe.
 
Ay ga lakkal daŋ gandaa boro laadirantey se
hala i ma goro ay jere,
boro kaŋ ga dira fondo šerrante ga,
nga no ma goy ya ne.
 
Zanbante si goro ay hugoo ra.
Taariharkaw si kay ay jine.
Subbaahi kul ay ga gandaa boro laaley kul halaci,
ka borey kul kaŋ ga šerretaray jaŋay tee kaa Abadantaa koyraa ra.