102
Boro kaŋ ga taabi Irkoy ŋaarayroo
1 Woo ti boro kaŋ ga taabi Irkoy ŋaarayroo, waati kaŋ binoo hun, de a ga nga huzunoo daaru Abadantaa jine.
2 Abadantaa, haŋajer ay ŋaarayroo se,
ay faaba ceeci kaatiroo ma too hala ni do!
3 Masi ni ndumoo tugu ya ne ay bine marayyanoo hane.
Ni haŋaa gaaru ya ne! Han kaŋ ay ga kaati,
ma cahã ka tuuru ya ne.
4 Zama agay aloomuroo ga hima nda dullu kaŋ ga bisa,
ay birey gʼay ton sanda denji ciray.
5 Ay binoo dunbu, a kogu sanda subu,
ay dirɲa ka ŋaa.
6 Ay hẽenoo durayyanoo se
ay kuuroo ga denji ay birey ga.
7 Ay ga hima nda saajoo cirawfutu,
ay tee sanda cirawfutu dumi foo kaŋ se i ga nee duuricanba
kaŋ goo hugu kayrey game.
8 Ay ga hanna
sanda ciraw folloku kaŋ goo sooro boŋ.
9 Zaaroo kul agay iberey gʼay kaynandi,
i ga žee kʼay danga.
10 Ay ga boosu ŋaa sanda ŋaayan,
ay mundawey ga birji ay haŋhayaa ra,
11 ni binetunyanoo nda ni futuroo sabbu se,
zama nʼnʼay tunandi kʼay warra.
12 Agay aloomuroo ga hima nda aluula bii,
ay ga kogu sanda subu.
13 Amma ni, Abadantaa, ni goro kokoytaraa ra hala abada,
boro ga honga ni zaman ka kaa zaman.
14 Nʼga tun, nʼga tamalla Siyoŋ koyraa se,
zama waatoo ti woo kaŋ ra nʼga alhormo tee a se,
waatoo kaŋ kayandi ti woo.
15 Zama ni tamey ga baa nga tondey,
i ga hinna nga kayriroo se.
16 Woo ra gandawey ga hunbur Abadantaa maaɲoo,
laboo kokoyey kul ga yadda ni daržaa ga.
17 Zama Abadantaa ga Siyoŋ cin taaga,
a ga bangay nga daržaa ra.
18 A ga bere ka haŋajer borey kaŋ i nʼi kom ŋaarayroo se,
a si ngi ŋaarayroo yala.
19 Woo ma hantumandi zamanoo kaŋ goo kaa izey se
hala jamaa kaŋ ga kaa ka takandi ma Abadantaa saabu,
20 a goo nga nongu henanantaa ra beene, a ga fuuni ganda,
Abadantaa goo beenaa ra, a ga laboo guna,
21 hala nga ma maa kasa-izey durayyanoo,
hala nga ma borey kaŋ kayandi wiiyan se feeri,
22 hala i ma Abadantaa maaɲoo har Siyoŋ ra,
de i ma nga saaburoo har Žerizalem ra,
23 waati kaŋ jamawey nda kokoytarawey marga
ka Abadantaa gana.
24 A nʼay gaaboo žabu fondaa ra,
a na agay aloomuroo dungurandi.
25 Ay nee: «Ay Koyoo, masʼay wii,
ka gar ay goo agay aloomuroo gamoo ga,
ni kaŋ ni jiirey ga bara zaman ka kaa zaman!»
26 Za gayyan nʼna laboo daaru,
beenaa manʼti kala ni kabe teegoyoo.
27 Ngi, i ga kaa ka dere, amma ni, nʼga cindi.
I kul ga žen sanda bankaaray.
Nʼgʼi barmay sanda darbay, i ga barmayandi.
28 Amma ni, nʼga cindi ni takaa ga,
ni jiirey si ben.
29 Ni tamey izey ga duu gorodoo,
ngi hayroo ga tabati ni jine.