Ay hundoo, albarka tee Abadantaa se,

yala haya kul kaŋ goo ay ra ma nga maa henanantaa saabu.

2 Ay hundoo, albarka tee Abadantaa se,

masi dirɲa nga gomney ra haya kul!

3 Nga no ma ni zunubey kul yaafa,

nga no ma ni wircey kul noo baani.

4 A ga ni hundoo kaa saaraa guusoo ra,

a ga borohennataray nda tamalla tee ma ne kokoy fuula.

5 A ga gomni tee ma ne hala ni žeenay ga,

a ga ni soogataraa taagandi sanda dutal.

6 Abadantaa si goy kala šerretaray se,

a ga borey kul kaŋ i gʼi torro noo ngi cimoo.

7 A na nga fondawey cebe Musa se,

ka nga teegoyey cebe Izirayel borey se.

8 Abadantaa ga hinna, a ga alhormo tee,

a si cahã ka futu, nga borohennataraa ga beeri.

9 A si kašeta boro ga waati kul,

a si dooray dii hala abada.

10 A manʼir dii ka sawa nda ir zunubey,

a manʼir bana ka sawa nda ir laybey.

11 Zama takaa kaŋ nda beenaa goo laboo se beene,

takaa din da nga borohennataraa ga beeri nga hunburkey se.

12 Takaa kaŋ nda waynahunay ga mooru waynakaŋay,

takaa din da nda a nʼir laybey moorandi ir.

13 Takaa kaŋ nda baaba ga tamalla nga izey se,

takaa din da Abadantaa ga hinna nga hunburkey se.

14 Zama nga, a ga takaa bay kaŋ nda ir teendi,

a ga hongu kaŋ ir manʼti kala labu.

15 Adamize hunaroo ga hima nda subu,

a ga boosu sanda faarey kutukuryaa.

16 Amma nda hew tun, a dere,

nongoo kaŋ ra a cindi hunday sʼa bay koyne.

17 Amma Abadantaa borohennataraa goo

nga hunburkey ga waati kul hala abada,

nga šerretaraa goo ngi izey izey ga,

18 borey kaŋ ga nga amaanaa dii,

kaŋyaŋ ga hongu hayey kaŋ a nʼi har kʼi ka dira.

19 Abadantaa na nga kokoy gorodogoo gorandi beenaa ra,

nga laamaa goo haya kul boŋ.

20 Abadantaa almalaykey, wa albarka daŋ a se,

war kaŋ ti wongaari gaabanteyaŋ,

war ga nga šennoo ka goy,

ka haŋajer šennoo se kaŋ a nʼa har.

21 Wa albarka daŋ Abadantaa se,

war kul kaŋ ti nga wongu-ize jamaa,

war kaŋ ti nga tamey, war kaŋ ga nga ibaayoo tee!

22 Abadantaa takahayey, war kul ma albarka daŋ a se

nongu kul kaŋ ra war goo nga hinoo cire.

Ay hundoo, albarka tee Abadantaa se!